+21 °С
Болотло
Белем һәм тәрбиә
12 Ноябрь 2020, 20:50
“Ҙур этнографик диктант”та – икенсе урын!
Башҡортостан халҡы үҙенсәлекле акцияла рекорд ҡуйыуға өлгәште.
Башҡортостан күптән түгел ойошторолған "Ҙур этнографик диктант"та үҙенсәлекле рекорд ҡуйҙы. Уны яҙған кешеләр һаны буйынса республика ил төбәктәре араһында Мәскәүҙән ҡала икенсе урынды биләне. Был турала Башҡортостан Мәҙәниәт министрлығынан хәбәр иттеләр.
Ойоштороусылар белдергәнсә, республиканан был акцияла барлығы 138409 кеше ҡатнашҡан.
Хәтерегеҙгә төшөрәбеҙ: 3 – 8 ноябрҙә Халыҡ-ара акция – “Ҙур этнографик диктант” булды. Этнография өлкәһендәге белемен рус, инглиз һәм испан телдәрен белгән кешеләр тикшереп ҡараны.
Был эште онлайн тәртиптә Рәсәй төбәктәрендә һәм 122 сит илдә йәшәгән 1 742 661 кеше башҡарып сыҡҡан, шуларҙың 138409-ы, алда әйтелгәнсә, Башҡортостанда йәшәүселәр.
Быйылғы ҡатнашыусыларҙың дөйөм һаны былтырғы менән сағыштырғанда дүрт тапҡырға күберәк булған. Диктант үткәрелә башлағандан алып биш йыл эсендә иһә уны өс миллион кеше яҙған.
Фото: Башҡортостан Мәҙәниәт министрлығы.
