Танырлыҡ та түгел...

Башҡортостан илебеҙҙә төрлө тармаҡ буйынса алдынғы булған шикелле, төҙөлөш йәһәтенән дә һынатмай. Айырыуса белем усаҡтарының күпләп төҙөлөүе иғтибарҙы йәлеп итә. Шул уҡ ваҡытта республикабыҙ һәр милли проектты тормошҡа ашырыуҙа бүтәндәргә өлгө күрһәтә. “Мәғариф” өҫтөнлөклө милли проекты ла шуға асыҡ миҫал.

Әйтәйек, республикабыҙҙың төнь­яҡ-көнсығышында урынлашҡан Ба­лаҡатай районының алдынғы эш тәжрибәһен күптәр өйрәнә. Төбәк етәк­селеге тәүге көндәрҙән үк “Мә­ғариф” милли проектын бөтә тулы­лығында бойомға ашырыуға ең һыҙғанып тотондо. Балаҡатай районы хакимиәте башлығы Мәсхүт Миңле­ғәлиндең һүҙҙәренә ҡарағанда, заман менән бергә атлағандарҙың киләсәге яҡты, һәр бала матди-техник базаһы яҡшы, төрлө йүнәлештә үҫеү өсөн һәр яҡлап та шарттар булған, ҡыҫ­ҡаһы, заманса мәктәптә уҡырға тейеш.

Беҙгә хәбәр итеүҙәренсә, “Мәға­риф” милли проектының “Һәр бала­ның уңышы” федераль проектына ярашлы, Ямаш ауылы мәктәбенең спорт залына ремонт үткәрелгән. Бөгөн иһә бындағы йөҙҙән ашыу ҡыҙ һәм малай заманса спорт залында шөғөлләнә.

– Класта партала ултырып уҡыған баланың арыуы бәхәсһеҙ, – тип аң­лата педагогтар. – Дәрес ваҡытында был бигерәк тә беҙгә, уҡытыусыларға, ныҡ һиҙелә. Кемдер урынында ултырып сыҙай алмай борғолана, икен­селәр юҡ сәбәпте бар итеп тороп ала. Дөрөҫ, тәнде яҙып алырға кәрәк, физик күнегеүҙәр тағы ла дәртлә­неберәк белем эстәүгә этәрә. Бөгөн беҙҙең мәктәптең спорт залын танырлыҡ та түгел, бында барыһы ла балалар өсөн эшләнгән.

Беҙҙе спорт залы менән таныш­тырҙылар. Ҡыҙ һәм малайҙар дәрескә шул хәтлем мөкиббән киткән, хатта сит кешеләрҙең инеүен дә шәйлә­мәне. Уның иркен һәм яҡты булыуы күҙгә ташланды. Спорт төрөнөң ҡайһыһы менән шөғөлләнергә теләй­һең, рәхим ит, барыһы өсөн дә юлдар асыҡ.

Егеттәр һөйләүенсә, әгәр элек спорт залы ҡотһоҙ күренһә, унда ин­геләре лә килмәһә, хәҙер был урынға атлығып торалар. Һәр егет физкультура дәресен яратырға тейеш, күнек­мәләргә йөрөү – әрмегә яҡшы әҙерлек ул.

– Көткәнгә ҡарағанда ла яҡшыраҡ булды, – тип малайҙарҙың фекерен ҡеүәтләй ҡыҙҙар. – Тышта ҡойоп ямғыр яуып торғанда ла, физкультура дәрестәре үтә.

Ата-әсәләрҙең дә ҡыуанысы сик­һеҙ. Ни генә тиһәң дә, спорт һөйгән, сәләмәт йәшәү рәүешен үҙ иткән балалар арабыҙҙа күп.

Ямаш ауылы мәктәбе районда һәр йәһәттән дә беренселекте бирмәй. Белем усағында спорт залының яңыр­тылыуы киләсәктә спортсыларҙың тағы ла артыуына килтерер, әлбиттә.

Балаҡатай районы.