Башҡорт телендә һөйләшәм...

“Миләш” балалар баҡсаһы мөдире Гөлнара Яубәшированың һүҙҙәренә ҡарағанда, белем усағы быйыл март айында ғына асылған.

Бөгөн бында 150-гә яҡын ҡыҙ һәм малай иҫәп­ләнә, бөтәһе алты төркөм бар. Ирина Хәйруллина, Илүсә Әфләтунова һәм башҡа тәрбиәселәр көнө буйы балалар эргәһендә.

– Балалар баҡсаһында малай һәм ҡыҙҙар башҡорт телен теләп өйрәнә, – тип һөйләй Гөлнара Ғабдулхаҡ ҡыҙы. – Бының өсөн төрлө йүнәлештә әсбаптар бар, алфавиттағы башҡорт хәрефтәрен һәр кем дөрөҫ итеп әйтергә күптән өйрәнде.

Кескәйҙәрҙең күңелендә башҡорт теленә ҡарата һөйөү уятыуға күп көс кәрәк, был тәң­гәлдә тәрбиәсе Гөлназ Мөхөбуллина ең һыҙ­ғанған. Уның тыныс тауышына балалар күптән өйрәнгән. Әйткәндәй, уҡытыу­сының улар янына килеүен барыһы ла түҙемһеҙлек менән көтөп ала.

– Башҡорт алфавитын өйрәнеү әллә ни ауыр булманы, балалар үҙҙәре тырыш булғас тиҙ генә был эште тамамланыҡ, – тип һөйләй Гөлназ Сәләх ҡыҙы. – Күп телдәр белгән кеше тор­мошта маҡсатлы йәшәй тип малай һәм ҡыҙ­ҙарҙы белем эстәргә өндәйем, дәртләндерәм.

Башҡорт теле йылы менән бәйле “Миләш” балалар баҡсаһында төрлө саралар ойошторолған. Гөлнара Яубәширова уларҙың һәр береһе уйын формаһында үтеүен ғорурланып һөйләне.

Мәсетле районы.