Грант та оттоҡ беҙ...

Белем усағы быйыл йәй Бөтә Рәсәй “Изгелек каникулға китмәй” конкурсында ҡатнашып, грант яулауға иреште. Директорҙың тәрбиәүи эш буйынса урынбаҫары Марина Хилалова етәкселегендәге “Ирекмәндәр – эштә” тип аталған проекттың төп маҡсаты – шар­лауыҡҡа илткән юлды маркировкалау һәм мәғлүмәт стендтары урынлаштырыу.

Тәү ҡарашҡа ябай ғына эш булып күренһә лә, проектты тор­мошҡа ашырыу күп көс талап итә. Мәҫәлән, башта “Арғымаҡ” ирек­мәндәр командаһы ағзалары, ошо йүнәлештә курс үтеп, белемдәрен нығыта. Унан һуң инде “Туризм” түңәрәгендә (етәксеһе – СССР буйынса альпинизм чемпионы Ф. Б. Харрасов) шөғөлләнеүселәр ме­нән берлектә картография эш­тәрен башҡарып ҡайталар. Был иһә бер нисә көн ваҡытты ала, сөнки уҡыусылар туҡталҡанан алып Ғәҙелшаға тиклемге араны үлсәй, артабан схема эшләү өсөн барыһын да ҡағыҙға төшөрөп бара.

Киләһе этапта билдәләнгән маршруттар буйынса күрһәткестәр ҡуйыла. Бында сәйәхәтселәргә уңайлы булһын өсөн ике йүнә­лештәге һуҡмаҡтар маркировкалана, йәғни махсус әҙерлеге бул­ған туристар өсөн һары төҫтәге һуҡ­маҡ ҡулай булһа, тәбиғәт ҡо­мартҡыһын күрергә килгәндәр ҡыҙыл менән билдәләнгән юлдан бара ала. Туҡталҡа янында Ғә­ҙелша шарлауығы хаҡында мәғ­лүмәтте һәм фотоһүрәттәр менән схемаһын үҙ эсенә алған ике стендтың барлыҡҡа килеүе, шулай уҡ өҫкә юл тотоусыларға ҡалған араны күрһәткән табличкаларҙың ҡуйылыуы халыҡ өсөн уңайлыҡтар тыуҙыра.

Барлыҡ эште тамамлағас, Сибай гимназия-интернаты турист фес­тивале уҙғарҙы. Грант һөҙөм­тәләре булараҡ ойошто­ролған сарала Хәйбулла, Әбйәлил райондарынан һәм Сибай ҡалаһынан командалар ҡатнашып, иҫтәлекле бүләктәр алып ҡайтты.