Тырышһаң, хыялдар тормошҡа аша!

Заман менән йәнәш атлаған, йәш быуынға белем һәм тәрбиә биргән Рәйфә Рәхмәтова, 2020 йылда республикала иғлан ителгән Башҡорт теле йылы сиктәрендә иң һөҙөмтәле эшләгән уҡытыусы булараҡ, район хакимиәте баш­лығы ҡулынан Диплом һәм сертификат менән бүләкләнгән.

Иҫәнгилде ауылында тыуып үҫкән ҡыҙ бала саҡтан уҡытыусы булырға хыяллана. Һигеҙенсе клас­ты тамамлағас, Сибай педагогия училищеһына уҡырға инә. Хеҙмәт юлын тыуған ауылында пио­нер во­жатыйы булып башлай, белемен камиллаштырыу маҡса­тында сит­тән тороп Башҡорт дәү­ләт уни­вер­ситетының башҡорт фило­логияһы факультетын тамамлай. Артабан Сиҙәм урта мәктә­бендә башҡорт теле һәм әҙәбиәте уҡы­тыусыһы булып эшләй.

Яңы Ергән ауылы егете Ғәлиәх­мәт Рәхмәтовҡа кейәүгә сыҡҡас, йәш уҡытыусыға үҙ һөнәре буйынса мәктәптә эш урыны булмай. Бында ла юғалып ҡалмай ул: ун йылдан ашыу ауыл мәҙәниәт йортонда директор вазифаһын тарта. Был ауыл үҙенең күп милләтле булыуы менән айырылып тора. Сиҙәм күтәреү осоронда был яҡтарға Ҡалтасы районынан бер төркөм удмурт халҡы килә һәм ошонда төпләнеп ҡала. Шулай уҡ ауылда баш­ҡорттар, рустар, сыуаштар, тажиктар йәшәй. Шуныһы ҡыуаныслы: халыҡ үҙ-ара татыу, берҙәм һәм матур донъя көтә. Күп милләтле ауылда мәҙәни тормошто алып барыу ҙа еңелдән булма­ғандыр, әммә Рәйфә Рәхмәтованың дәртле һәм мауыҡтырғыс кисә­ләрен әле лә ауылдаштары һағынып иҫкә ала.

Шулай ҙа бала саҡтан һайлаған һөнәрен һағыныу, уҡытыусылыҡ эше­нә кире ҡайтыу теләге күңе­лендә һәр саҡ йөрөй. Ниһайәт, Рәйфә Хәмиҙулла ҡыҙы 2015 йылда кире мәктәпкә ҡайта һәм башкөллө яратҡан эшенә сума. Танһыҡ һәм күңеле ҡушҡан эшкә ең һыҙғанып тотонған уҡытыу­сының һөҙөмтәләре оҙаҡ көт­төрмәй: уҡыусылары район һәм республика олимпиадаларында призлы урындар яулай, төрлө конкурстарҙа ҡатнашып, еңеүселәр рәтен тулыландыра.

– Башҡорт теле һәм әҙәбиәте буйынса олимпиадала Дилфүзә Мәмбәтова – район күләмендә еңеү­се, Наҙгөл Ҡоломбәтова, Зөһ­рә Мәмбәтова, Лиана Түләшева при­зерҙар булды. Дилфүзә Мәм­бәтова – әле Башҡорт дәүләт уни­вер­си­тетының журналистика бүле­генең I курс студенты. Республика кимәлендә үткәрелгән “Ғабдулла Туҡай моңдары” бәйгеһендә шағирҙың шиғырын сәхнәләштереү буйынса номинацияла тәүге йыл өсөнсө урын алһаҡ, былтыр еңеүсе булдыҡ, – ти әңгәмәсем.

Коронавирус эпидемияһына бәйле дәрестәр күпселек дистанциялы алымда үтеүенә ҡара­маҫ­тан, уҡыусыларҙың башҡорт те­ленә ҡарата ҡыҙыҡһыныуы кәме­мәгән. Киреһенсә, онлайн конкурс­тарҙа, олимпиадаларҙа, төрлө конфе­рен­цияларҙа әүҙем сығыш яһа­ғандар, төрлө шиғри һәм йыр флеш­моб­та­рынан да ситтә ҡал­мағандар. Мәктәп фольклориадаһы конкурсында район кимәлендә “Халыҡ­тарҙың милли кейемдәре” но­минацияһында Нургизә Рәх­мә­това еңеүсе булһа, “Мәжит Ғафури уҡыуҙары-2020” конкурсында Алтынай Ҡәйепова, Ралина Ҡолом­бәтова, Гүзәл Тасбулатова икенсе урын яулаған. Яҙыусы Рәшит Солтангәрәевкә арнап үткәрелгән шиғыр конкурсында Алтынай Ҡәйепова номинант булған.

Бар яҡлап уңған һәм тәжрибәле педагог мәктәптә “Башҡорт фольклоры” түңәрәген етәкләй һәм халҡыбыҙҙың милли йолаларын, ғөрөф-ғәҙәттәрен, йыр-моңдарын, милли байрамдарын йәш быуынға өйрәтә, халыҡ ижадына ҡарата ғорурлыҡ тойғолары тәрбиәләп кенә ҡалмай, ә уларҙы сәхнә­ләш­терә лә. Уҡыусылар ҙа, ата-әсәләр ҙә фольклор байрамдарында бик теләп һәм әүҙем ҡатнаша.

Тормош иптәше Ғәлиәхмәт Рәхмәтов – белем усағы директоры.Татыу ғаиләнең йәме булып ҡыҙҙары Нургизә үҫә.

Хыялдарҙың ҡасан да тормошҡа ашыуын геройым яҡшы аңлай, шуға күрә яратҡан эшенән йәм һәм тәм табып йәшәй, яңы уңыштарға өлгәшә.

Хәйбулла районы.