+20 °С
Болотло
Белем һәм тәрбиә
14 Май 2021, 09:57
Фән менән шөғөлләнеү өсөн мөмкинлектәр ҙур
Студенттарға фән һәм ғилем менән шөғөлләнеү өсөн бөтә мөмкинлектәр бар – теләк кенә булһын. Йәш ғалимдар һаулыҡ һаҡлау өлкәһендә, техник яңылыҡтар йүнәлешендә төрлө ҡыҙыҡлы эштәр алып бара.
Студенттарға фән һәм ғилем менән шөғөлләнеү өсөн бөтә мөмкинлектәр бар – теләк кенә булһын. Йәш ғалимдар һаулыҡ һаҡлау өлкәһендә, техник яңылыҡтар йүнәлешендә төрлө ҡыҙыҡлы эштәр алып бара.
Мәҫәлән, күптән түгел БДУ-ның юғары молекуляр бәйләнештәр һәм дөйөм химик технологиялар кафедраһында ғалимдар, полимерҙарҙы өйрәнеп, асыҡ яраларҙы тиҙ бөтәштерә һәм дауалай алған шекәрә (япма) уйлап сығарған һәм уның физик-механик сифаттарын ҡулланырға өйрәнгән.
“Беҙ элек эшмәкәрлегебеҙҙә хитоза ҡуллана инек, хәҙер икенсе полисахаридтар, йәғни пектин, карбоксиметилцеллюлоза менән эш итәбеҙ. Был полимерҙар яранан сыҡҡан экссудатты – шыйыҡсаны үҙенә һура, һеңдерә ала, артабан ул яра өҫтөндә тарҡала һәм уны дауалай”, – тине химия фәндәре докторы, профессор Елена Кулич.
Юғары технологик шекәрә эсендә дарыу препараттары буласаҡ, улар ферментатив гидролиз ваҡытында организмға үтеп инергә һәләтле. Был ысулдың тағы бер яҡшылығы бар – ул тарҡалғанда яра өҫтөндә яңы күҙәнәктәр барлыҡҡа килә, шуға күрә кешенең тиреһе лә тиҙ арала яңыра.
Ябай ғына әйткәндә, япма киләсәктә кешеләргә бинт ҡулланмайынса яраларҙы уңалтыу мөмкинлеген бирәсәк. Ғөмүмән, ғалимдар бөгөн тән туҡымаһын тиҙ арала яңыртыу юлдарын эҙләй.
Башҡорт дәүләт университетының юғары молекуляр бәйләнештәр һәм дөйөм химик технологиялар кафедраһы ғалимдары ике тиҫтәнән ашыу йүнәлештә тикшереүҙәр алып бара. Бында заман талаптарына яуап биргән лабораториялар эшләй, шуға күрә студенттарға үҙҙәрен төрлө яҡлап һынарға мөмкинлектәр бар.
