“Фән тауына тырыштар ғына менә”

Уҡыу йортонда даими рәүештә халыҡ-ара, Рәсәй кимәлендә төрлө ғилми-ғәмәли конференциялар, түңәрәк өҫтәлдәр, оҫталыҡ дәрестәре, курстар, “Асыҡ ишек”тәр көнө, көньяҡ-көнсығыш район­дарының белем биреү учреждениелары етәкселәре, уҡытыу­сылары һәм уҡыусылары өсөн осрашыуҙар ойошторола. Фәнни эҙләнеүҙәр төрлө йүнәлештә алып барыла, гранттар яулау буйынса маҡсатлы эш башҡарыла.

Үткән йыл ауыр булыуға ҡарамаҫтан, бөтәһе 80-дән ашыу ғилми-тикшеренеү эше өсөн төрлө предприятие, шәхси компания, Урал аръяғы район һәм ҡала хакимиәттәре менән эш киле­шеүҙәре төҙөлгән.

Сибай институты ғалимдары һәм хеҙмәткәрҙәре тарафынан 287 ғилми эш донъя күргән, шул иҫәптән 15-е төрлө илдең фәнни журналдарында баҫылған. Сту­дент­тарҙың 204 ғилми эше, төрлө сығанаҡтарҙа донъя күреп, 48 диплом, грамота, премия һәм миҙалдарға лайыҡ булған. Рәсәйҙә иғлан ителгән Фән һәм технологиялар йылында был маҡсатта план ҡабул ителгән һәм халыҡ-ара фәнни-ғәмәли конференция үткәреү планлаштырылған. Фән менән етди шөғөлләнеү маҡсатында уҡыу йортона йылына яҡынса 9 миллион һум аҡса сарыф ителә. Уҡытыусыларға ла, студенттарға ла бары эҙләнергә, табырға һәм яңы уңыштарға өлгәшергә генә ҡала.

Иң яҡшы төркөм

“Иҡтисад һәм хоҡуҡ” фа­культетындағы “Юриспруденция” бүлегенең өсөнсө курс төркөмө уҡыу йорто буйынса “Иң яҡшы төркөм” тип танылған. Куратор Ольга Трофимова етәксе­легендәге төркөмдә бөтәһе 12 студент белем ала, барыһы ла яҡшы билдәләргә генә өлгәшә.

Иң мөһиме – ҡыҙҙар һәм егеттәр һәр эшкә асыҡ, дәртле, креатив һәм белемле, талантлы һәм һәләтле. Улар уҡыу йортондағы бөтә сараларҙа әүҙем ҡатнаша, һәр саҡ призлы урындар яулай.