Белемгә табан юл имен булһын!

Баш ҡалала “Өфө-Арена” боҙ майҙаны алдында Башҡортостан Башлығы Радий Хәбиров, Хөкүмәт Премьер-министры урынбаҫары Азат Бадранов, мәғариф һәм фән министры Айбулат Хажин 140 мәктәп автобусы асҡыстарын тапшырҙы. Асҡыс алған мәктәп директорҙары республика етәкселегенә ҙур бүләк өсөн рәхмәт әйтте, дәүләт тарафынан бүленгән иғтибарҙы баһаланы.

Тантаналы сараны асып, Радий Хәбиров уҡытыусы­ларҙы һөнәри байрамдары менән ҡотланы.

– Бөгөн бик әһәмиәтле көн. Һеҙҙең хеҙмәтегеҙ ба­һалап бөткөһөҙ. Води­тел­дәр­ҙең дә эше яуаплы, ә уҡыусы­ларҙы йөрөткәндәр­ҙеке айырыуса. Ата-әсәләр һеҙгә донъялағы иң ҡәҙерле кешеләрен – балаларын ышанып тапшыра. Әле республикала 50 меңгә яҡын бала мәктәп автобусында белем алырға йөрөй. Улар­ҙың хәүеф­һеҙлеге өсөн беҙ, өлкәндәр, яуап бирәбеҙ, – тине ул.

Айбулат Хажин мәктәп автобустары асҡысын тап­шыр­ғанда:

– Бөгөн Өфөнән респуб­ликаның һәр районына тиерлек һары мәктәп автобустары тараласаҡ. Ошоноң ме­нән мәктәптәрҙең ихтыяжын ҡәнә­ғәт­лән­дерҙек тип ҙур ғорурлыҡ менән әйтә алам. Тағы ла ике мең бала йылы һәм заманса автобус­тарҙа уҡыр­ға йөрө­йә­сәк. Уларҙың барыһы ла ҡыш­ҡы юлда йө­рөү йәһәтенән хә­үеф­һеҙ. Был айырыуса Урал аръяғы райондары өсөн мө­һим. Балаларҙың хә­үеф­һеҙ­леге – тәү сираттағы буры­сы­быҙ, – тип билдәләне.

Автобус асҡысы алғанға ҡыуанған­дар араһында Ейән­сура районы Арсен ауылы мәктәбе водителе Тимерәз Ҡараҡынов та бар. Ул ошо белем уса­ғын­да 40 йыл эш­ләй. Автобус өс ауылдан балаларҙы мәктәп­кә йөрөтә. Директор Гөлназ Тоҡомбәтова әй­те­үен­сә, белем усағында 72 бала уҡый, шуларҙың 14-е автобус менән уҡырға килә.

– Техника мәктәп өсөн бик кәрәк. Тәү сиратта – хәүеф­һеҙлек. Балалар­ҙың имен-аман ҡайтып етеренә шик­ләнмәйбеҙ. Икенсенән, ярыш, конкурс­тарға йөрөүе уңайлы буласаҡ. Балалар район, республика кимәлен­дә үткән сараларҙа ҡатна­шырға тейеш, – ти мәктәп директоры.

Салауат районынан килгән вәкил­дәр Радий Хәбиров ҡулынан асҡыс алғас, төбәк етәксеһен ҡунаҡҡа саҡырҙы. Ошо көндәрҙә ундағы Лаҡлы ауылында яңы мәктәп асыласаҡ.

- Лилиә НУРЕТДИНОВА.