Намыҫлы хеҙмәттәре өсөн бүләкләнделәр

Башҡортостан Башлығы Радий Хәбиров Уҡытыусылар көнөндә Өфөләге Колонна залында бер төркөм уҡытыусыларға – дәүләт наградаларын һәм республикабыҙҙың ауыл мәктәптәрендә эшләгән йәш педагогтарға (грант отҡан конкурс еңеүселәренә) бүләктәр тапшырҙы.

– Барыбыҙ өсөн дә Уҡытыу­сы көнө – иң сағыу һәм мөһим байрамдарҙың береһе, – тине республика етәксеһе. – Пе­да­гог­тарҙы ҡотларға ҙур их­лас­лыҡ менән килдем. Иң беренсе ауыр ҙа, ҡатмарлы ла, әммә намыҫлы хеҙмә­тегеҙ өсөн рәх­мәт һүҙҙәрен еткерәм. Һеҙҙең тырышлығығыҙ арҡаһында малайҙар һәм ҡыҙҙар ысын кеше һәм Рәсәй гражданы була, яҡшы сифат­тарҙы үҙ­ләш­­терә.

Радий Фәрит улы бил­дә­лә­үен­сә, Башҡортостанда мә­ғариф тармағына ҙур иғтибар бүленә. 2019 йылдан алып беҙҙә 37 мәктәп һәм 49 балалар баҡсаһы төҙөлгән. Рәсәй Президенты Владимир Путин­дың ҡушыуы буйынса, йыл аҙа­ғына хәтлем мәктәптәр, айырыуса ауыл мәктәптәре капиталь ремонт буйынса федераль программаға ингән. Уның нигеҙендә 365 мәктәп төҙөкләндереләсәк.

– Башҡортостан өсөн мәға­риф йүнәлешен үҫтереү йәһә­тенән уҙған ике йыл шул тиклем уңышлы булды, – тип шатлығы менән уртаҡлашты Радий Хәбиров. – Беҙҙең Евразия ғилми-белем үҙәге федераль статус алды. Улай ғына түгел, республикабыҙ студенттарҙың кампусын төҙөүгә бюджет грантын отто. Алдынғы өс университет “Приоритет-2030” програм­ма­һында ҡатнашыу йәһәтенән заявка­ларҙы яҡларға өлгөрҙө. Әлбиттә, был төбәктең юғары уҡыу йорттарына икенсе һулыш бирәсәк.

Республика етәксеһе коронавирус пандемияһы осоронда сыҙамлы бул­ғандары өсөн уҡытыусыларға рәхмәт әйтте. Ысынлап та, һынылышлы мәлдә мәктәптәр дистанцияла уҡытыу­ға күсте, ә педагогтар тиҙ арала уҡы­тыуҙың яңы методикаһына ҡулай­лашты.

– Дистанцияла уҡытыу алымы менән эшләһәгеҙ ҙә һәм даими каран­тинда булһағыҙ ҙа, һаман да бала­ларға төплө белем бирәһегеҙ, – тине Радий Хәби­ров. – Олимпиада еңеү­се­ләре – шуның һөҙөм­тәһе. Быйыл Берҙәм дәүләт имтиханы йомғаҡ­тары буйынса 109 ҡыҙ һәм егет 100 балл йыйҙы, ә биш уҡыусы имтиханда хатта икешәр предметтан 100-әр балл алды.

Шуныһы иғтибарға лайыҡ, Башҡор­тостан Башлығы 2019 йылдың июнь айында ауыл­да­ғы йәш уҡытыусыларға яр­ҙам йөҙөнән 600 мең һум кү­ләмендә йыл да бирелә торған 100 грант бул­дырҙы. 2020 йылда гранттың күләме 690 мең һумға тиклем артты.

Республика етәксеһе, ошо ярҙам менән мөмкин хәтлем алдынғы ҡараш­лы уҡытыу­сылар файҙаланһын өсөн, 2022 йылда ауыл уҡытыу­сыларына гранттар һанын 200-гә хәтлем арттырыу тәҡдимен еткерҙе.

Башҡортостандың атҡаҙан­ған уҡытыусыһы исемен ун уҡытыу­сы алды, ә грант ауыл мәктәбен­дә эшләгән 40 уҡы­тыу­сыға бирелде.

– Балаларҙың теүәл фән­дәргә ынтылышын күреү  шат­лыҡлы, – тине Ҡырмыҫ­ҡалы районын­дағы Ҡырмыҫ­ҡалы гимназияһы­ның химия уҡы­тыу­сыһы, Баш­ҡортос­тан­дың атҡа­ҙан­ған уҡытыусыһы Гүзәл Ардыуанова. – Йыл да бер нисә сығарылыш уҡыусы­һы юғары уҡыу йортта­рының химия факультетына уҡырға инә.

Инна Байғүбәкова Күгәрсен районы Мораҡ ауылындағы 1-се мәктәптә инглиз теленән уҡыта. Йәш уҡытыусы­ның һүҙ­ҙә­ренә ҡарағанда, сит тел­дәрҙе тәрән өйрәнгән уҡыусы­ларҙың барыһы ла тормошта үҙ урындарын еңел таба. Ғөмүмән, ҡыҙ һәм малай­ҙарҙа инглиз телен өйрәнеүгә бәлә­кәй­ҙән көслө теләк уятырға була. Тырыш­лыҡ һәм үҙ һөнә­ренә һөйөү генә юҡҡа сыҡ­маһын, һүнмәһен.

- Илдар АҠЪЮЛОВ.