Балалар баҡсаларында – башҡорт төркөмдәре

Республикабыҙҙың балалар баҡсаларында башҡорт төркөмдәренең даими асылыуына күнегеп бөттөк тә инде, ә инде милләттәштәребеҙ күпләп ғүмер кисергән Рәсәй төбәктәрендә бындай күренеш – һәммәбеҙ өсөн дә ҙур ҡыуаныс, хатта уны ҙур ваҡиға булараҡ ҡабул итәбеҙ. 

Күптән түгел Башҡортостан менән Силәбе өлкәһенең Мәғариф һәм фән министрлыҡтары үҙ-ара хеҙмәт­тәшлек тураһында һөйләшеү ойош­торғайны, унда туған телдә уҡытыу мәсьәләһе лә ҡаралды.

Оло һөйөнөсөбөҙ менән уртаҡ­лашабыҙ – быйыл яңы уҡыу йылы алдынан Силәбе ҡалаһындағы 88-се һәм Силәбе өлкәһенең Миәс ҡалаһындағы 99-сы балалар баҡса­һында кескәйҙәр өсөн башҡорт төркөмдәре асылды.

– Быға хәтлем улыбыҙ йөрөгән балалар баҡсаһына һүҙ тейҙе­рер­лек түгел, – тип һөйләй Вадимдың әсәһе Альбина Мәғсүмова. – Төркөм заманса матур итеп би­ҙәлгән, тәрбиәселәр һәр береһенә иғтибар бүлергә тырыша. Ә инде өйгә ҡайт­ҡас, ғәзизебеҙ менән ирем дә, мин дә башҡортса ғына ара­лашырға тигән маҡсат ҡуйҙыҡ. Барыбер ҙә балалар баҡсаһының да, урамдағы мөхиттең дә йоғонтоһо көслө булды. Хәҙер башҡорт төркөмө асылғас, хәлдәр бөтөнләй бүтәнсә. Улыбыҙ менән рәхәтләнеп башҡортса һөйләшәбеҙ.

Йәш әсә Әминә Ғабдел­йәно­ваның һүҙҙәренә ҡарағанда, ул ҡыҙының полиглот булыуын теләй. Шуны күҙ уңында тотоп, балаһын ҡалалағы “Тел үҙәге”нең инглиз түңәрәгенә йөрөтә.

– Венера башҡортса ла, русса ла яҡшы белә, сит телдәрҙе өйрәтеү – күптәнге ниәтебеҙ, – тине Әминә ханым. – Балалар баҡсаһында башҡортса уҡытыу алып барыласаҡ тигән хәбәрҙе ишетеү менән ҡыҙыбыҙҙы шунда бирҙек. Был аҙымды эшләп оттоҡ ҡына. 

Әлбиттә, республикабыҙҙың Мәға­риф һәм фән министрлығы “Баш­ҡорт­остан Республикаһының дәүләт телдәрен һәм Башҡортостан Рес­публикаһы халыҡтары телдә­рен һаҡлау һәм үҫтереү буйынса дәүләт программаһы”н тормошҡа ашырыу сиктәрендә, башҡорт телен уҡы­тыуҙы ойоштороу йәһә­тенән, иле­беҙҙең милләт­тәш­тәребеҙ күпләп йәшәгән төбәктә­рендәге белем усаҡтарын ярҙа­мынан өҙмәй.

Мәҫәлән, 2019 йылдан алып Рәсәй төбәктәренә 25 меңдән ашыу дана уҡытыу-методик әҙәбиәт, эш дәфтәре, башҡорт теле һәм әҙә­биәте буйынса программа өлгөһө, башҡорт теле һәм әҙәбиәте кабинетын йыһазландырыу-биҙәү йүнә­лешендә кәрәк-яраҡ оҙатылған. Бынан тыш, илебеҙ төбәктәрендә эшләгән 53 уҡытыусы “Башҡорт теле һәм әҙәбиәте уҡытыусыһы” програм­маһы буйынса профессиональ әҙерлек курсы үткән, 82 башҡорт теле һәм әҙәбиәте уҡытыусыһы белемен камиллаштырған.

- Илдар АҠЪЮЛОВ

Силәбе өлкәһе.