Үҙәк белемгә әйҙәй!

“Зубово Life” ҡасабаһында “Белем” тигән өр-яңы мәғариф үҙәге асылды. “Демография” милли проекты нигеҙендә бойомға ашырылған белем биреү учреждениеһы ҡыҫҡа арауыҡта федераль һәм төбәк аҡсаһы иҫәбенә төҙөлгән.

Тантанала Башҡортостан Баш­лығы Радий Хәбиров ҡатнашты һәм балаларға изге теләктәрен еткерҙе.

– Зубов ауылындағы мәктәп барыбыҙ өсөн дә кәрәк, – тип билдәләне Радий Фәрит улы.

Республика етәксеһе хәбәр итеүенсә, һәр бала заманса белем усағында белем һәм тәрбиә алырға тейеш. Белем биреү учреждениелары төҙөү – өҫтөнлөклө йүнә­лештәрҙең береһе.

“Жилой квартал” компания­һының матбуғат хеҙмәте хәбәр итеүенсә, бындағы мәктәптең һәм балалар баҡсаһының асылыуын йөҙҙән ашыу ғаилә түҙемһеҙләнеп көткән. Мәктәп – 640, ә балалар баҡсаһы 160 урынға иҫәпләнгән.

Өфө районының Зубов ауылы йылдан-йыл етеҙ темпта үҫә. Халыҡ бында күпләп ағыла. Айырыуса йәштәр был урында ныҡлап нигеҙ ҡора. Ул Ағиҙел йылғаһының ҡушылдығы Берсианка йылғаһы янында урынлашыуы менән дә отош­ло. Етмәһә, ауыл Өфөнән әллә ни йыраҡ түгел. Күптәрҙең баш ҡалала эшләүен иҫәпкә алғанда, ныҡ уңайлы.

Йәмилә Искәндәрованың һүҙҙә­ренә ҡарағанда, улар ошо балалар баҡсаһын күптән көткән.

– Балалар баҡсаһы беҙ йәшәгән йорттан йыраҡ түгел, – ти Йәмилә ханым. – Улыбыҙҙы һәм ҡыҙы­быҙҙы йәһәт кенә садикка индереп ҡалдырабыҙ ҙа ирем менән эшкә елдерәбеҙ. Икебеҙҙең дә эш урыны – Өфөлә. Зубов ауылында фатир һатып алғаныбыҙға шатланып бөтә алмайбыҙ. Ҡалалағы шау-шыуҙан ҡасырға теләп, Өфө янында йәшәйбеҙ.

Яхъя Ҡолдәүләтов фекеренсә, өр-яңы белем усағында тәрбиә алған бала һәр ваҡыт яңы идеялар менән янып йәшәй, ғүмер буйына яңылыҡҡа, яҡшы ғәмәлдәргә ынтыла.

– Башҡортостан Башлығы Радий Хәбировтың шәхсән бында юлланып, тантаналарҙа ҡатнашыуы – беҙҙең өсөн оло мәртәбә, – ти әң­гәмәсем. – Уның беҙгә ҡарата хөр­мәт күрһәтеүе – ихтирам бил­дәһе ул. Ә инде балалар баҡ­саһына килгәндә, һөйөнөсөбөҙ сикһеҙ. Ейәнем менән ике ейән­сәрем ифрат бәхетле. Улар көн дә шәп яңылыҡтар менән ҡайта, улай ғына ла түгел, беҙгә шатланып һөйләйҙәр. Ғәзиз кешеләрем гимнастика менән шөғөлләнгән, улар музыка кабинетында йыр серҙә­ренә төшөнгән. Ошо бәхет түгелме ни?!

- Илдар АҠЪЮЛОВ

Өфө районы.