Гимназияла телестудия буласаҡ

Инициатив бюджетлау –  мәктәп уҡыусыларының мөһим проекттарын тормошҡа ашырыу өсөн Хөкүмәт ярҙамын алыуҙа ҙур мөмкинлек ул. Шул шатлыҡлы, Бәләбәй райо­ны буйынса конкурсҡа тәҡдим ителгән дүрт мәғариф учреждениеһы араһында Бәләбәй ҡалаһының башҡорт гимназия-интернаты ла бар.

Быйыл ғинуарҙа гимназия-интер­наттың VII-XI класс уҡыу­сыларынан торған биш команда үҙҙәренең проектын яҡлау йәһә­тенән көс һынашты. Проектты һай­лап алыуҙа команданың барлыҡ ағзалары ла тауыш биреүҙә ҡатнашты. Тәҡдим ителгән эштәр бик ҡыҙыҡлы ине. Ҡыҙҙар һәм малайҙар мәктәп ижади студияһын асыу, мәктәп оранжереяһын төҙөү, робот техникаһы класын булдырыу, лингафон кабинетын йыһаз­ландырыу, заманса спорт майҙан­сығын сафҡа индереү өсөн тауыш бирҙе. Күптәр педагогтар Динар Минәжев менән Зүлиә Исламова етәкселегендәге “Ижади студия”ға өҫтөнлөк биргәс, улар еңеүсе тип танылды. Был проект сиктәрендә балалар ижади телестудияһы ойоштороу планлаштырыла.

Телевидениелағы техник эш процесын үҙләштереүҙе үҙ эсенә алған автор сюжеттары, телевизион тапшырыуҙар һәм тематик видеотаҫмалар әҙерләүҙә уҡыусы­ларҙың әүҙем ҡатнашыуы иғтибар­ҙы йәлеп итте. Шулай итеп, балалар өсөн телеиндустрия һөнәре­нең үҙенсәлектәрен практикала өйрәнеү мөмкинлеге тыуа. Был уларға киләсәктә конкурентлыҡ мөхитендә эш итергә өйрәтә, сөнки яңы мәғлүмәт технологияларын белеү – заман талабы.

– Беҙ тәҡдим иткән контент бик кәрәкле, сөнки бөгөн беҙҙең районда телевидение юҡ, – тип һөй­ләй Бәләбәй башҡорт гимназия-интернаты директоры, Башҡортос­тандың мәғариф алдынғыһы Дил­бәр Фәт­хет­динова. – Район тормошонан яңылыҡтар баҫтырып, төрлө репортаждар эшләп был бушлыҡты тултыра алыр инек. Шулай уҡ материалдарҙы социаль сел­тәрҙәрҙә, республика теле­видениеһы эфиры аша ғына таратып ҡалмай, ә үҙебеҙҙең гимназияла онлайн тапшырыу өсөн стриминг майҙансығы ойоштора алыу мөмкинлеге лә  ҙур.

Зөлфиә ҒИЛМАНОВА, Бәләбәй башҡорт гимназия-интернаты уҡытыусыһы.

Бәләбәй ҡалаһы.