Иҫке Сибай мәктәбе яңы уҡыу йылына төҙөлөп бөтәсәк

Подрядсы ғәйебе менән Иҫке Сибайҙа мәктәп төҙөү эше бик һүлпән бара ине. Хәҙер хәл үҙгәрҙе.

"Ҡыҙғанысҡа ҡаршы, тендерҙа еңеп тә, ниндәйҙер сәбәптәргә һылтанып, эште башҡармаған төҙөлөш ойошмалары бар, – тип билдәләне А. Назаров. – Был осраҡта подрядсы алдына ҡуйылған бурысты үтәй алманы, шуға ла контракт өҙөлдө, ә ойошма намыҫһыҙ подрядсылар исемлегенә индерелде".

Премьер-министр Иҫке Сибай халҡының ризаһыҙлығы ғәҙел тип билдәләне – объект вәғәҙә ителгән ваҡытҡа тапшырылманы. 

"Дәғүәләр менән ризабыҙ, - тине А. Назаров. - Яңы подрядсы менән эш күләмен билдәләнек, республика Хөкүмәтенән өҫтәмә ярҙам кәрәккән йүнәлештәрҙе асыҡланыҡ. Яңы аҙна башынан төҙөүселәр һанын арттырабыҙ. Бурыс ҡуйылды, халыҡҡа иғлан ителде: мәктәп яңы уҡыу йылына төҙөлөп бөтәсәк". 

Премьер-министр, төҙөлөштө контролдә тотоу - Хөкүмәттең бурысы, тип билдәләне. Киләһе сәфәр 11 мартҡа тәғәйенләнгән.

Фото: Башҡортостан Хөкүмәте сайты.