Ике аралағы "күпер" нығынды

18 мартта Сибайҙың Рамаҙан Өмөтбаев исемендәге башҡорт лицейы тәжрибә уртаҡлашыу маҡсатында Өфөнөң 2-се смарт полилингваль гимназияһынынан ҡунаҡтарҙы ҡабул итте.

Осрашыу "түңәрәк өҫтәл" артында ойошторолған файҙалы, фәһемле фекер алышыуҙан башланды. Директор Дилә Фәтҡуллина үҙ сығышында лицей тормошондағы уңыштар, еңеүҙәр, сағыу ваҡиғалар менән таныштырҙы. Китапханасы Мәрйәм Вәлиева этнографик һәм Рамаҙан Өмөтбаев музейҙарына экскурсия ойошторҙо. Артабан ҡунаҡтар асыҡ дәрестәргә саҡырылды. Башланғыс класс уҡытыусылары Г.Д. Ибраһимова, Ф.Ә. Кәримова, Р.У. Бәрәкәтова, башҡорт теленән Л.Н. Миңләхмәтова, математиканан А.С. Хәмитова, рус теле һәм әҙәбиәтенән С.Ә. Ғәбитова, тарихтан З.Ғ. Ғүмәрова, инглиз теленән Э.И. Байбулатова күрһәткән дәрестәр юғары кимәлдә үтте.

Осрашыу лицей уҡыусылары тарафынан әҙерләнгән концерт менән тамамланды. Ә.Т. Исрафилова етәкселегендәге Зәкир Үҙәнбаев исемендәге бейеү ансамбленең сығыштары, Л.В. Байсурина өйрәткән йырҙар барыһының да күңеленә хуш килде. Ҡасандыр ошо лицейҙа белем алып, хәҙер Өфөнөң 2-се смарт полилингваль гимназияһында директор эшен атҡарған Наил Радик улы Әминев ҙур рәхмәт белдерҙе, туған лицейына изге теләктәрен еткерҙе, артабан да бергәләп, тәжрибә уртаҡлашып эшләргә саҡырҙы.

Фото һәм текст сығанағы: Рамаҙан Өмөтбаев исемендәге башҡорт лицейы сайты.