40 меңгә яҡын уҡыусы “Оҙон тәнәфес”тә ҡатнаша

“Оҙон тәнәфес” Бөтә Рәсәй конкурсында Башҡортостандан 40 мең самаһы уҡыусы ҡатнашырға теләк белдергән.

Республика балалары был сарала өсөнсө йыл рәттән ҡатнаша. Бер йыл элек конкурсҡа 10641 бала ғариза яҙғайны. Быйыл 16 майға ҡарата 5-7-се кластарҙан 22 мең, 8-10-сы кластан 18 меңдән ашыу уҡыусы ғариза биргән.

Мәғлүм булыуынса, “Оҙон тәнәфес”тә 5-10-сы класс уҡыусылары, шулай уҡ колледждарҙың 1-3-сө курс студенттары ҡатнаша. Һүҙ Рәсәйҙәге генә түгел, шулай уҡ сит ил уҡыусылары тураһында ла бара. “Оҙон тәнәфес” конкурсы “Рәсәй – мөмкинлектәр иле” президент платформаһына инә.

Быйыл конкурсанттар 12 тематик йүнәлеште һайлай ала. Улар – фән һәм технологиялар, сәнғәт һәм ижад, журналистика һәм яңы медиа, ирекмәнлек, тарихи иҫтәлек, сәләмәт тормош, экология, урбанистика, сәйәхәт һәм туризм, белем биреү технологияларын үҫтереү, йәштәр эшҡыуарлығы, дәүләт оборонаһы һәм хәүефһеҙлек.

Ҡатнашыусылар 10 июнгә тиклем bolshayaperemena.online платформаһында теркәлә. Еңеүселәргә “Артек” халыҡ-ара үҙәгенә юлламалар, Санкт-Петербургтан Владивостокка тиклем сәйәхәт итеү мөмкинлеге, аҡсалата премиялар һәм уҡыуға йәки эш башлауға гранттар бирелә. Финал 26-31 июлдә Артекта үтә.

Колледждарҙың сығарылыш курс студенттары араһындағы еңеүселәргә берәр миллион һум, 1-2-се курстағыларға 200-әр мең һум, еңеүселәрҙең уҡытыусыларына 150-әр мең һум тапшырыла. “Оҙон тәнәфес” финалсыларын күпләп әҙерләгән 20 һөнәри белем биреү ойошмаһы ике миллион һум күләмендә грант ала.

Әйткәндәй, быйыл “Оҙон тәнәфес”тә тәүге тапҡыр Донецк һәм Луганск халыҡ республикаларынан уҡыусылар ҡатнаша.

“Оҙон тәнәфес” конкурсы менән https://vk.com/video-193258751_456306017 һылтанмаһы буйынса танышырға мөмкин.

Фото: ufaved.info