"Өфө" аэропорты балаларға нимә бүләк итте?

Бөгөн, Халыҡ-ара балаларҙы яҡлау көнөндә, “Өфө” аэропорты “Бәхет биләмәһе” мәрхәмәтлек фонды менән берлектә Өфө ҡалаһының ғаилә тәрбиәһенә ярҙам үҙәге һәм Ф.Ш. Үтәшев исемендәге үҫмерҙәр клубы тәрбиәләнеүселәре өсөн экскурсия ойошторҙо.

Байрам геройҙары менән бергә  экскурсияла “Бәхет биләмәһе” фонды попечителе, Башҡортостан Башлығының ҡатыны Каринэ Хәбирова һәм “Өфө” халыҡ-ара аэропорты генераль директоры Александр Андреев та ҡатнашты.

"Аэропортта балалар өсөн экскурсия уҙғарыу – күптән уйланылған проект. Ләкин пандемия уны быға тиклем тормошҡа ашырырға ҡамасауланы. Бөгөн, ҡояшлы матур байрам көнөндә, “Бәхет биләмәһе” фонды һәм Мостай Кәрим исемендәге “Өфө” халыҡ-ара аэропорты балалар йорто һәм Фуат Үтәшев исемендәге үҫмерҙәр клубы ҡыҙҙары һәм малайҙарына аэропорт эшенең бөтә серҙәрен күрһәтте", – тине Каринэ Хәбирова.

Ҡунаҡтар өсөн махсус программа әҙерләнде, уның сиктәрендә улар “Өфө” аэропорты эшенең үҙенсәлектәре менән танышты, ғәҙәттә сит кешеләргә инеү тыйылған бүлексәләрҙә лә булды. Балалар экскурсоводтарҙың, хеҙмәт етәкселәренең һөйләгәндәрен ҡыҙыҡһынып тыңланы. Авиация менән йәш ҡыҙыҡһыныусыларға тиҙ генә әҙерләп махсус рейсҡа теркәү ҙә ойошторолдо, уларға иҫтәлеккә сувенир рәүешендә ултырыу талондары бирелде.  

Бынан һуң ҡунаҡтар һауа судноларын техник хеҙмәтләндереү ангарында булды һәм Ту-154 самолет-тренажеры бортына күтәрелде. Унда һәр ҡунаҡ штурвал артына ултырып, иҫтәлеккә фотоға төшә алды.

Аэропорттың кинология хеҙмәтенең эше лә балаларҙа ҙур тәьҫораттар ҡалдырҙы: уларҙың күҙ алдында эттәр багажда ташыу өсөн тыйылған предметтарҙы эҙләне һәм тапты. Шулай уҡ экскурсия ҡунаҡтары диспетчер вышкаһынан һауа судноларының күтәрелеү, ултырыу күренешен күҙәтте.

"Бөгөн, Халыҡ-ара балаларҙы яҡлау көнөндә, аэропортта был байрам геройҙарын ҡабул итеү беҙҙең өсөн ҙур мәртәбә, - тине “Өфө” халыҡ-ара аэропорты акционерҙар йәмғиәте генераль директоры Александр Андреев. – Был экскурсияның маҡсаты  кәмендә икәү: беренсенән, балаларға шатлыҡ бүләк итеү, икенсенән, предприятиены эстән күрһәтеү. Аэропортта 400 һөнәр буйынса хеҙмәткәрҙәр эшләй. Бөгөнгө экскурсия кемдәрҙәлер был һөнәрҙәргә ҡыҙыҡһыныу тыуҙырһа, беҙ бик шат булыр инек".

 Фото: “Өфө” аэропорты матбуғат хеҙмәте.