Һөнәр һайлау – яуаплы эш

Башҡортостан Хөкүмәтенең рәсми сайтында хәбәр итеүҙәренсә, республиканың 70 меңдән ашыу уҡыусыһы хеҙмәт баҙарында талап ителгән һөнәрҙәр буйынса эшмәкәрлек өлкәһен һайлау һәм һөнәри белем алыу буйынса сараларҙа ҡатнашҡан.

- Профессиональ үҙбилдәләнеш үҙаллы һайлаған һөнәрҙең мәғәнәһен, ҡиммәтен табыу процесынан тора. “RPOF мөхит” республика профессиональ үҙбилдәләнеш фестивале, “Һөнәри оҫталыҡ дәресе”, “Минең хобби – минең эшем” һөнәри йүнәлеш биреү саралары, “Юғары ос!” республика өсөнсө мәктәп мәғарифы форумы – бөтә был саралар республика уҡыусыларына, йәш үҙенсәлектәрен иҫәпкә алып, үҙе өсөн кәрәкле һөнәр тураһында мәғлүмәткә эйә булырға ярҙам итә, - тип һөйләне Башҡортостан Республикаһының мәғариф һәм фән министры Айбулат Хажин.

Былтыр 26-28 августа Өфөлә үткән “Йәш профессионалдар” милли чемпионатының финалы һәм VI-XI класс уҡыусыларына иртә һөнәри йүнәлеш биреү буйынса “Киләсәккә билет” проекты үҙҙәренең кәрәклеген һәм мөһим булыуын күрһәтте. Чемпионат финалында V-XI класс уҡыусылары өсөн һөнәри йүнәлеш буйынса комплекслы майҙансыҡ ойошторолдо. Унда 17 меңдән ашыу уҡыусы ҡатнашты һәм шәхси маршрут төҙөү буйынса тәҡдимдәр алды.

2021 йылдың октябрендә Башҡортостанда “Киләсәккә билет” проекты сиктәрендә Бөтә Рәсәй һөнәри йүнәлеш дәрестәре уҙҙы. Улар VI-XI класс уҡыусыларына һөнәрен һайларға ярҙам итә.

2021 йылда һөнәри белем биреү ойошмалары һәм бизнес араһында 170 килешеү, юғары уҡыу йорттары менән мәғариф эшмәкәрлеге мәсьәләләре буйынса үҙ-ара эш итеү тураһында алты килешеү төҙөлгән.

Мәҫәлән, Башҡортостан агросәнәғәт колледжы республиканың алдынғы агросәнәғәт компанияларының береһе – “Алексеевка” комплексы менән килешеү төҙөгән. Салауат белем биреү һәм профессиональ технологиялар колледжы туризм тармағы менән бәйле компетенцияларҙы үҫтереү маҡсатында “Башҡортостан” милли паркы менән килешеүгә өлгәшкән. Учалы тау сәнәғәте колледжы уҡыусыларҙы тау сеймалын табыу сәнәғәте предприятиелары - “Сатурн”, “Башҡорт күмере”, “Дорзеленстрой” яуаплылығы сикләнгән йәмғиәттәре, “Учалы тау-байыҡтырыу комбинаты” акционерҙар йәмғиәте, “Башҡа донъя” яуаплылығы сикләнгән йәмғиәте һәм башҡалар менән килешеүҙәр төҙөгән. Банк өлкәһе предприятиелары, шулай уҡ сервис компаниялары өсөн кадрҙар әҙерләгән Өфө сауҙа-иҡтисад колледжы “Росгосстрах” суднолар компанияһы, “ФК Открытие”, “Капитал Страховкалау” асыҡ акционерҙар йәмғиәттәре, “Байрам”, “Лента”, “Ашан”  йәмғиәттәре, “Премьер” рестораны менән хеҙмәттәшлек итә. Өфө дәүләт технология һәм дизайн колледжы “Иннополис университеты” коммерцияға ҡарамаған автономиялы ойошмаһы менән хеҙмәттәшлек тураһында килешеү төҙөгән.

Квалификациялы кадрҙар әҙерләү йүнәлешендә тармаҡ предприятиелары һәм белем биреү ойошмаларының үҙ-ара эшмәкәрлегенә ҡағылышлы 19 сара ойошторолған. “Машиналар эшләү комплексы өсөн квалификациялы кадрҙар әҙерләү: үҫеш перспективалары” темаһына "түңәрәк өҫтәл" үткәрелгән. Сара барышында машиналар эшләү комплексы предприятиеларының Башҡортостандың һөнәри белем биреү ойошмалары менән үҙ-ара эш итеүе, машина эшләү өлкәһе өсөн кадрҙар әҙерләү, заманса уҡыу оҫтаханалары төҙөү мәсьәләләре, шулай уҡ кәрәкле хеҙмәт ресурстарын әҙерләү өлкәһендә инвестиция климатын яҡшыртыу инструменттары ҡаралған.

Шулай уҡ Башҡортостан Мәғариф һәм фән министрлығы, “КамАЗ”, “НефАЗ” һәм “ТЗА” йәмғиәттәре араһында автомобилдәр эшләү өлкәһендә квалификациялы эшселәр, хеҙмәткәрҙәр, урта звено белгестәре әҙерләү маҡсатында үҙ-ара эш итеү тураһында килешеүгә ҡул ҡуйылған.

Сығанаҡ: pravitelstvorb.ru