Бында Герой рухы йәшәй

Герой исемен йөрөткән мәктәп ниндәй була икән? Беҙ шундай уҡыу йорттарының береһен барып күрҙек. Илеш районының Бишҡурай ауылында урынлашҡан, ике тапҡыр Советтар Союзы Геройы Муса Гәрәев исемен йөрөткән белем усағы ул.

Йәйге ял булһа ла, унда балалар тауышы ишетелеп ҡала, уҡытыусы­ларҙың да күп­се­леге урында. Балалар мәктәп яны участка­һында мәж килә. Беҙҙе иһә мәктәп директоры Ильвира Әхмәт­йәнова һәм уның урынбаҫары Ильвина Миңлеғәли­мова ҡаршыланы.

– Мәктәбебеҙгә Муса Гәрәевтең исеме 2011 йылда бирелде. Ул ошо би­нала уҡыған тиһәң, бигүк дөрөҫ тә түгел, иҫке мәктәптә белем алған. Беҙ, әлбиттә, уны үҙебеҙҙә уҡыған тип иҫәпләйбеҙ, бының менән сикһеҙ ғорурланабыҙ, – ти Ильвира Фәһим ҡыҙы.

Үткән уҡыу йылында урта мәктәптә 61 бала иҫәпләнгән, ике уҡыусы XI класты һәм ете бала IX класты тамамлаған. Директор бил­дә­ләүенсә, XI класты тамамлаған ҡыҙҙарҙың береһе алтын миҙалға лайыҡ булған, уларҙың икеһе лә юғары уҡыу йорттарына бара. Туғыҙынсыны бөткәндәрҙең иһә бөтәһе лә мәктәп менән хушлаша.

– Беҙҙең ауылда Муса Гәрәев исемендәге кооператив бар. Мәктәп уның менән тығыҙ бәйләнештә эшләй. Колхоз беҙгә һәр яҡлап ярҙам итә. Беҙ ҙә уларҙы кадрҙар менән тәь­мин итергә тырышабыҙ. Быйыл туғы­ҙынсыны тамамлаған балалары­быҙҙың бөтәһе лә ауыл ерендә кәрәкле һөнәрҙәр алмаҡсы: агроном, зоотехник, бухгалтер, ветеринар. Уҡып бөткәс, кире ҡайтыр­ҙар тип көтәбеҙ. Ауылда колхоз булғас, беҙ­ҙең киләсәк бар, – ти мәктәп директоры.

Мәктәп янында балалар баҡса­һы ла эшләй. Бында әле 14 бала тәрбиәләнә. Беренсе класҡа иһә ун баланың килеүен көтәләр. Ильвира Фәһим ҡыҙы әйтеүенсә, бала­лар баҡсаһының мәктәп менән бер урында урынлашыуы бик уңайлы.

Мәктәптә Муса Гәрәев рухы тойола. Коридорҙар уның тураһын­дағы мәғлүмәт һәм фотолар менән биҙәлгән, линейкалар үтә торған урынға Геройҙың бюсы ҡуйылған. Муса Гәрәев класы ла бар, ул башҡорт теле кабинетында нигеҙ­ләнгән.

– Муса Гәрәев – башҡорт геройы, шуға күрә лайыҡлы рәүештә тап башҡорт теле кабинетын уға арнаныҡ. Ғөмүмән, беҙҙең мәктәптә туған телгә ҙур иғтибар бүленә. I кластан алып төплө өйрәнәбеҙ. IX класты тамамлағандар мотлаҡ дәүләт имтихан­дарының береһен башҡорт теленән тапшыра, – ти Ильвира Әхмәтйәнова.

Башҡорт теленән бында энер­гия­­һы ташып торған тәжрибәле уҡы­тыусы Рәмзилә Рафат ҡыҙы Хәҙи­мул­­лина уҡыта, шулай уҡ мәктәп театры түңәрәген алып бара. Уның уҡыу­сы­лары һәр ваҡыт әүҙем, төрлө конкурстар­ҙа, олим­пиа­даларҙа ҡат­наша һәм призлы урындар яулай.

Коллективта 16 уҡытыусы эш­ләй, барыһы ла юғары белемле.

– Йәш педагогтарға ла ҙур иғтибар бүләбеҙ. Килһәләр, уларҙы үҫтерергә тырышабыҙ. Бына үҙем­дең ҡыҙым Ильвина Миңлеғә­лимова ла ауылға ҡайтты, инглиз теленән уҡыта. Күңелем тыныс, бурысым үтәлде, үҙемә алмаш үҫ­тер­ҙем. Тағы бер йәш уҡытыусы­быҙ башланғыс класс уҡыусы­ла­рына белем бирә, уға ла өмөтөбөҙ ҙур, – тип йылмая директор. 

Мәктәп баҡса янындағы биләмә­һе менән дә бик ғорурлана. Улар йәй буйы бында йәшелсә, емеш-еләк үҫтерә һәм үҙҙәренә ҡышҡа етерлек запас хәстәрләй. Аҙаҡ уны ашханаларында әҙерләп, балалар­ҙы тәмле итеп ашаталар.

– Герой исемен йөрөтөү – ғорурлыҡ ҡына түгел, ҙур яуап­лы­лыҡ та. Быны һәр уҡытыу­сы, һәр бала яҡшы аңлай. Данлы исеме­беҙҙе дәлилләп, төрлө район һәм республика конкурстарында ҡатна­шып еңәбеҙ, Муса Гәрәев хөрмә­тенә күп саралар үткәрә­беҙ. Уға арналған иҫтәлекле урындарҙы тәртиптә тотабыҙ. Иң мөһиме – балаларҙы патриотик рухта, ысын илһөйәрҙәр итеп тәрбиәләйбеҙ, – тип оҙатып ҡалды беҙҙе биш­ҡурайҙар.

- Әлфиә МИНҒӘЛИЕВА

Илеш районы