“Фантазиям шкафта ята”

Ағайымдың ҡыҙы Асияға өс йәш самаһы. Ауылға ҡайтҡанда эргәбеҙҙә булыша, бер туҡтауһыҙ хәбәр һөйләй. “Беҙ баҡсала шулай иттек... Тәрбиәсе апай былай тине...” тип һөйләүенә аптырап һорап ҡуйҙым:

– Һин баҡсаға йөрөйһөңмө ни?

– Эйе, йөрөйөм, – ти күҙ ҙә йоммай.

– Унда нимә эшләйһегеҙ?

– Иртәнсәк зарядка эшләйбеҙ, ашайбыҙ, уйнайбыҙ. Малайҙар ныҡ шаяра, апайҙы тыңламай... – тип бик ихлас һөйләп алып китте был. Эргә-тирәләге балаларҙы исемләп тороп әйткәс, ышанып та ҡуйҙым. “Әллә ысынлап баҡсаға йөрөй башланымы?” – тип һорайым апаһынан. “Юҡ, уйлап сығарып һөйләй”, – тип шым ғына көлдө тегеһе.

Ҡыҙыҡ күреп, тағы һорауҙар бирәм. Шатырлатып яуап бирә.

– Кейемеңде ҡайҙа ҡуяһың?

– Шкафҡа ҡуям.

­– Шкафыңда ниндәй һүрәт төшөрөлгән, әллә хәреф яҙылғанмы?

– Ҡуян һүрәте төшөрөлгән.

Әңгәмәбеҙ шулай йәнле генә бара ине, бер һорауға нимә тип яуап бирергә белмәй туҡтап ҡалды.

– Бының фантазияһы бөттө шикелле, – тиеүебеҙгә:

– Юҡ, минең фантазиям бар ул, просто баҡсалағы шкафта ятып ҡалды! – тип көлдөрҙө зирәк ҡыҙыҡай.

Фото: abon-news.ru