Ул һәр саҡ үҫешкә ынтыла

Башҡортостанда республика Башлығының 2019 йылдың 11 июнендә ҡабул ителгән Указына ярашлы ауыл ерендә эшләгән йәш уҡытыусыларға 600 мең һум күләмдә грант бирелә. Бындай матди ярҙам төрөнә халыҡ һаны 15 меңдән артмаған ауыл-ҡасаба мәктәбендә ике йылдан күберәк эшләгән 35 йәшкә тиклемге белгестәр дәғүә итә ала.

Гөлнара Рудольф ҡыҙы Хөснийәрова Борай районы үҙәгендәге Борай 3-сө урта мәктәбендә инглиз теленән уҡыта. Ул – намыҫлы, фиҙакәр хеҙмәте өсөн ошондай матди ярҙамға лайыҡ булған уҡытыусыларҙы береһе.

Гөлнара Рудольф ҡыҙы ошо ауылда тыуып үҫеп, Борайҙағы 2-се гимназияны тамамлай һәм Бөрө дәүләт социаль-педагогия академияһына (бөгөн БДУ-ның Бөрө филиалы) уҡырға инә. 2009 йылда уҡыу йортон уңышлы тамамлағас, һис икеләнмәйенсә, тыуған төйәгенә эшкә ҡайта. Тап ошо мәлдә бында 3-сө мәктәп асылған була. Шул уҡ осорҙа ғаиләле лә булып киткәс, тормош юлдашы менән ауылда ныҡлы төпләнергә, Борайҙа йорт төҙөргә ҡарар итәләр.

Шулай итеп, йәш белгес яңы мәктәптә ең һыҙғанып эш башлай. Гөлнара Рудольф ҡыҙы үҙен төрлө яҡлап үҫтереүгә, уҡытыусы булараҡ, заман менән бергә атларға тырыша. Ул республика һәм Рәсәй кимәендәге конкурстарҙа, сараларҙа теләп ҡатнаша. “Минең өсөн еңеү яулау түгел, ә тәжрибә туплау, өйрәнеү, үҫешеү мөһимерәк”, - ти маҡсатлы уҡытыусы.

2021 йылда Гөлнара Хөснийәрова район кимәлендә үткән “Йыл уҡытыусыһы” конкурсында Гран-при яулай. Бәйгенең республика этабында ла уңышлы сығыш яһап, “Хәҡиҡәтте Ватанымда табам” номинацияһында билдәләнә. Ошо уҡ йылда ауыл ерендә эшләгән йәш уҡытыусыларға тәғәйен грант конкурсында ҡатнашып, еңеп сыға.

- Грантҡа конкурста ҡатнашыу өсөн белем биреү проекты ла әҙерләргә кәрәк ине. Мин балаларҙа уҡыуға ҡарата ҡыҙыҡһыныу тәрбиәләү алымдарына баҫым яһаным, - ти йәш белгес.

Әйткәндәй, уҡыусыларының да уңыштары тос ҡына. Улы (бер үк ваҡытта уҡыусыһы) Вадим Хөснийәров менән ҡатнашҡан республика конкурсында ижади һәләттәрен айырып билдәләйҙәр. Зилиә Хәсәнова исемле уҡыусыһы “Туҡай көйҙәре” бәйгеһендә I урын яулай. Шулай уҡ “Урал батыр” башҡорт халыҡ эпосы – кешелек мираҫы” халыҡ-ара конкурсында Борайҙың 3-сө мәктәбе уҡыусылары эпос нигеҙендә инглиз телендә уйын булдырып, айырым номинацияла еңеү яулай.

Һәр ваҡыт яңылыҡҡа, үҫешкә ынтылған Гөлнара Рудольф ҡыҙы йәмәғәт тормошонда ла әүҙем. Быйыл май айында Мәскәүҙә Федерация Советы Рәйесе Валентина Матвиенко менән ойошторолған осрашыуҙа ҡатнашып ҡайтҡан.  

- Хеҙмәтемде баһалағандары, һәр яҡтан дәртләндереп торғандары өсөн коллегаларыма, мәктәп етәкселегенә, район хакимиәтенең мәғариф бүлегенә ҙур рәхмәт. Ә инде 690 мең һум күләмендәге матди ярҙам өсөн республика етәкселегенә рәхмәтем сикһеҙ. Ауыл ерендә эшләгән йәш уҡытыусыларҙы ошолай дәртләндереүҙәре, ярҙам күрһәтеүҙәре оло ҡыуаныс, әлбиттә. Беҙ был аҡсаны улыбыҙға белем биреүгә йүнәлтергә ҡарар иттек, - ти Гөлнара Рудольф ҡыҙы.

Маҡсатлы, тырыш уҡытыусыға артабан да уңыштар юлдаш булһын, яңы уҡыу йыла ла шатлыҡлы ваҡиғалар, яңы ҡаҙаныштар менән һөйөндөрһөн!

Фотолар: Г. Хөснийәрованың шәхси архивынан.