Бергәләп кенә лайыҡлы граждан тәрбиәләп була

Яңы уҡыу йылы алдынан Рәсәйҙең мәғариф министры Сергей Кравцов онлайн форматта IX Дөйөм Рәсәй ата-әсәләр йыйылышын үткәрҙе. Сараның төп темалары ведомствоға мөрәжәғәттәрҙе анализлау нигеҙендә асыҡланды.

Министр яңы уҡыу йылына индерелгән яңы үҙгәрештәр тураһында ентекле һөйләне. Тәү сиратта һүҙ мәктәптәрҙең эш форматы тураһында булды. 1 сентябрҙә мәктәпкә барған 17,5 миллион уҡыусының ике миллионы – 1-се класҡа барған уҡыусылар. Уларҙың барыһы ла көндөҙгө форматта белем аласаҡ, арауыҡта уҡыу сараһыҙҙан булғайны.

Сергей Кравцов һүҙҙәренә ҡарағанда, 1 сентябрҙә 33 мең балалар баҡсаһы, 39 мең мәктәп һәм өс мең колледж балаларға ишеген асҡан. Өс сменала уҡыған мәктәптәр һаны һиҙелерлек – 71-ҙән өскә тиклем – кәмегән. Планлаштырылған 1 300-ҙән 600 мәктәп төҙөлгән. Тотош ил буйынса 155 яңы мәктәп асылған. Биш йылда Рәсәйҙә федераль аҡса иҫәбенә 7 300 мәктәп ремонтланасаҡ.

Башҡортостан уҡытыусылары IX Дөйөм Рәсәй ата-әсәләр йыйылышы тураһында үҙ фекерен белдерҙе. Мәләүездәге 8-се мәктәптең география уҡытыусыһы Наталья Ҡунаҡбаева һүҙҙәренә ҡарағанда, ата-әсәләр менән бәйләнеш кәрәк, тик ул мәктәп мәнфәғәттәренә зыян килтерергә тейеш түгел.

Өфөләге 95-се белем биреү үҙәге директорының уҡыу-тәрбиә эштәре буйынса урынбаҫары, биология уҡытыусыһы Федан Ғафаров фекеренсә, ата-әсәләр менән даими аралашырға кәрәк, тик бергәләп кенә илебеҙ өсөн лайыҡлы граждандарын тәрбиәләп була.

Фото: mgazeta.com