Баймаҡ лицей-интернатында - "Үҫеш нөктәһе"

Ил Президенты Владимир Путиндың май указдарын тормошҡа ашырыуға ярашлы, “Мәғариф” милли проектының (национальный проект “Образование”) "Заманса мәктәп" федераль проекты сиктәрендә республиканың күп райондарының белем биреү учреждениеларында, шул иҫәптән Баймаҡ ҡалаһының лицей-интернатында ла "Үҫеш нөктәһе" асылды.

Яңы заманса үҙәкте асыу тантанаһында Баймаҡ районы хакимиәте башлығы Фәнис Әминев, уның социаль мәсьәләләр буйынса урынбаҫары Айнур Кәримов, лицей-интернат директоры Иҙел Әбүбәкеров ҡатнашты.

"Беҙ тәүҙә кабинеттарҙы ремонтланыҡ, заман талаптарына яуап бирерлек итеп әҙерләнек. Яңы белем биреү үҙәге тәбиғи-фәнни һәм технологик йүнәлештәге төп һәм өҫтәмә программалар буйынса белем биреү эшмәкәрлеген бойомға ашырыу өсөн яңы мөмкинлектәр бирә. “Заманса мәктәп” федераль проекты сиктәрендә белем усаҡтары яңы заманса ҡорамалдар - һанлы лабораториялар, механика, робот техникаһы менән йыһазландырылды. "Үҫеш нөктәһе" үҙәге уҡыусыларҙың тағы ла мөмкинлектәрен асыр, уларға төрлө эҙләнеүҙәр үткәреүҙә ҙур ярҙам итер тигән ышаныстабыҙ", - ти Иҙел Данил улы.

“Үҫеш нөктәһе” үҙәген булдырыуҙың маҡсаты – ауыл ерендә һәм бәләкәй ҡалаларҙа урынлашҡан мәктәптәрҙә белем сифатын күтәреү өсөн шарттарҙы арттырыу, тәбиғи-фәнни һәм технология йүнәлешендәге уҡыу предметтарын үҙләштереүҙә уҡыусыларҙың мөмкинлеген киңәйтеү, шулай уҡ физика, химия, биология предметтары буйынса уҡыу материалын нығытыу.

Баймаҡ районында бөтәһе 14 белем усағында “Үҫеш нөктәһе” эшләй.

Фото: Баймаҡ районы хакимиәте сайты.

#ВладимирПутин
#национальныепроекты#нацпроекты
#региональныепроекты#регпроекты#нацпроектыБашкортостан