Мирас Ишдәүләтовты ихлас ҡотлайбыҙ!

Башҡортостандың мәғариф һәм фән министры Айбулат Хажин социаль селтәрҙәге сәхифәһендә ҡыуаныслы яңылыҡ менән уртаҡлашты.

"Беҙҙең Мирас Рәшит улы Ишдәүләтов "Иң яҡшы туған тел һәм әҙәбиәт уҡытыусыһы-2022" Бөтә Рәсәй конкурсында “Тамашасы һөйөүе” номинацияһында еңеү яуланы һәм һөнәри бәйгелә маҡтаулы 5-се урынды алды.

Педагогик эшмәкәрлегенең ҙур өлөшөн Мирас Ишдәүләтов Мәғариф һәм фән министрлығы ведомствоһындағы ойошмаларҙа хеҙмәт итеүгә арнаны. Рәми Ғарипов исемендәге 1-се башҡорт республика гимназия-интернатында эшләне, унан һөнәри юлын Ғәзиз Әлмөхәмәтов исемендәге республика гимназия-интернатында тәрбиәсе булараҡ дауам итте, Башҡортостандың архитектура, төҙөлөш һәм коммуналь хужалыҡ колледжында ла, Өфөнөң 2-се шифаханаһындағы мәктәп-интернатта ла белем бирҙе.

Лайыҡлы, намыҫлы, яуаплы, киң белемле уҡытыусы. Уңышы менән ысын күңелдән ҡотлайым!" - тип яҙҙы Айбулат Хажин.

Фотолар Айбулат Хажиндың сәхифәһенән.