Беҙҙеке – иң яҡшыһы!

Һүҙем – йыл һайын Рәсәй кимәлендә үткәрелгән “Гагарин кубогы” олимпиадаһы хаҡында. Был кубок йәш гагаринсыларҙы йыһанға яҡынайтҡан бер баҫҡыс, этәргес көс булып тора. Ә олимпиада үҙе – фәнни-техник үҫеш заманында республика йәштәренең аң-белемен тағы ла юғарыраҡ кимәлгә күтәргән сараларҙың береһе. Унда ҡатнашҡан балалар яңы ғилемгә ынтыла, белемен камиллаштыра.

Быйылғы “Гагарин кубогы” олим­пиадаһы һөҙөмтәләре буйынса Бөрйән районының Әбделмәмбәт дөйөм урта белем биреү мәктәбе “Иң яҡшы мәктәп” исеменә лайыҡ булып, диплом һәм Гагарин кубогы яулауға өлгәште. Тантанала хөр­мәтле коллегабыҙ, мәктәбебеҙҙең директоры Инсур Үтәбаевҡа Рәсәй Космонавтар федерацияһы президенты, ике тапҡыр Советтар Союзы Геройы, СССР-ҙың летчик-космонавы А.П. Александров тарафынан булдырылып, Ю.А. Гагарин Олим­пиадаһына ярашлы үткәрелгән мәғрифәти-патриотик проекттарҙы тормошҡа ашырыуҙағы уңыштары өсөн Ю.А. Гагарин миҙалы тапшырылды.

Сираттағы еңеүебеҙ – Инсур Рәмил улы Үтәбаев етәкселе­гендәге мәктәп коллективының тырышлыҡ, берҙәмлек һәм уртаҡ маҡсат менән эшләү һөҙөмтәһе ул. Киләсәктә лә уҡыусыларыбыҙ, уҡытыусыларыбыҙ, мәктәбебеҙ юғары ҡаҙаныштар яулап, әленән-әле ауылыбыҙҙы данлаһын, тигән теләктә ҡалабыҙ.

 
Г. ҠАСИМОВА

Бөрйән районы.