"Егерменсе"ләрҙең шәп етәксеһе ул!

Фатима Мостафина исемендәге 20-се Өфө ҡала башҡорт гимназияһы директоры Булат Илшад улы Зинуров теүәл бер йыл элек бик иҫтәлекле көндә – 5 октябрҙә – Уҡытыусылар байрамында гимназия директоры вазифаһында эш башлай.

“Өйрәнеү ауыр булды, тип әйтә алмайым, сөнки быға тиклем З. Биишева исемендәге 140-сы башҡорт мәктәбен етәкләп, күпмелер тәжрибә туплағайным”, - ти ул. Шулай уҡ республиканың Мәғариф һәм фән министрлығының Милли мәғариф идаралығы начальнигы вазифаһында эшләү ҙә ярайһы уҡ ҙур тәжрибә була йәш етәксегә.

Ошо бер йыл эсендә 20-се башҡорт гимназияһында булған яңылыҡтарҙың ҡайһы берҙәре: Салауат ҡалаһындағы “АСТ” компанияһы менән килешеү нигеҙендә электр энергетикаһы класы, робот техникаһы түңәрәге, милли көрәш секцияһы, “Өфө” футбол клубы менән берлектә футбол секцияһы, мультимузыкант Зәйнетдиндең бейеү мәктәбе асылған; хеҙмәт дәрестәре Республика балалар технопаркында үткәрелә башлаған; баш ҡаланың башҡорт, полилингваль белем усаҡтары менән хеҙмәттәшлек килешеүҙәре төҙөлгән; Фатима Мостафина исемендәге кабинет-музей һәм башҡорт теле, әҙәбиәте, мәҙәниәте үҙәге төҙөлгән, ошо исемдәге махсус премия булдырылған һ.б.  

Бында хәҙер ғәҙәти ҡыңғырау ҙа үҙенсәлекле: дәртле көйҙән һуң “Дәрес башлана! Һеҙ булдыраһығыҙ!” йәки “Дәрес тамам. Һеҙ – Башҡортостандың киләсәге!” һәм башҡа төрлө саҡырыуҙар яңғырай. Был башланғыс менән хатта Мәскәү ҡунаҡтары ла ҡыҙыҡһынған.

Фотолар: Фатима Мостафина исемендәге 20-се Өфө ҡала башҡорт гимназияһы архивынан.