Һөнәрҙәр тураһында белеү мөһим

Был проект һөнәри йүнәлеш биреү бурысын хәл итеүҙе маҡсат итеп ҡуйған. Уның һанлы платформаһында Башҡортостандан 30 меңдән ашыу ҡатнашыусы теркәлгән. Уларҙың өстән бер өлөшө һөнәри йүнәлеш диагностикаһын үткән, 8 меңләп уҡыусы һөнәри рекомендациялар алған.

- Проектты тормошҡа ашырыу барышында мәктәп уҡыусылары заманса хеҙмәт баҙары ҡоролошо һәм төбәктең һөнәри белем биреү системаһы тураһында иң көнүҙәк  белем ала, төрлө һөнәри өлкәләр менән таныша. Ә уҡытыусылар эш өсөн яңы тәжрибә туплай, - тине Башҡортостандың мәғариф һәм фән министры Айбулат Хажин.  

 1 октябрҙән 20-һенә тиклем төрлө муниципалитеттарҙан  15 мең мәктәп уҡыусыһы өсөн һөнәри йүнәлешле дәрестәр уҙғарылды, 9-30 октябрҙә Өфө һәм республика мәктәптәрендә “Киләсәккә билет” исемле һөнәрҙәргә ҡағылышлы  сериал ҡарау ойошторолдо. Һөнәрҙәр тураһында фильмдар менән  60 меңдән ашыу мәктәп уҡыусылары танышты. “Рәсәй – минең тарихым” тарихи паркы нигеҙендә “Киләсәк лабораторияһы” тигән күргәҙмә -квест ойошторолдо. Унда 5 меңдән ашыу уҡыусы ҡатнашты.  54 колледж, ике юғары уҡыу йорто нигеҙендә 56 район һәм ҡаланан 4500 уҡыусы өсөн һөнәри һынауҙар үткәрелде.

Әйтергә кәрәк, “Киләсәккә билет” проекты Рәсәй Президенты Владимир Путин ҡушыуы буйынса, илдең  85 төбәгендә тормошҡа ашырыла.Уның маҡсаты 6-11 класс уҡыусыларына һөнәр һайлауҙа булышлыҡ итеү.

 Фото: Башҡортостан Хөкүмәте сайты.