Журналист Рәмзиә Кәримова үҙ премияһын булдырған!

Башҡортостандың атҡаҙанған матбуғат һәм киң мәғлүмәт саралары хеҙмәткәре, Рәсәйҙең һәм Башҡортостандың журналистар союзы ағзаһы Рәмзиә Кәримова "Бәйләнештә"ге социаль сәхифәһенә үҙе белем алған уҡыу йортонда үҙ премияһын булдырыуы хаҡында яҙған.

"Тыуған ауылымда, Әбйәлил районы Әбделмәмбәт урта мәктәбендә китап уҡырға яратҡан, яҙышҡан, уҡыуҙа һәм йәмәғәт эштәрендә һынатмаған уҡыусыларға үҙемдең премиямды тапшырҙым! Тәүге премиямдың лауреаттары:
1. Исҡужина Лиза Шәфҡәт ҡыҙы (10 класс)
2. Дауытова Наҙгөл Фәнил ҡыҙы (9 класс)
3. Дауытова Нурия Әхәт ҡыҙы (4 класс) "- тигән ул.

Халыҡҡа һәр саҡ ярҙам ҡулы һуҙған, уларға ауыр ваҡытта бар йәмәғәтселекте күтәрә алған, уларҙың ауыр яҙмышана битараф ҡалмаған, ҡулынан килгәнсә ярҙам итергә ынтылған тынғыһыҙ Башҡортостан юлдаш телевидениеһының "Яңылыҡтар" хеҙмәте хәбәрсеһенең  был аҙымы хуплауға лайыҡ. Әйткәндәй, был башланғыс юҡҡа ғына барлыҡҡа килмәгән.

- Республика Башлығы киләһе йылды файҙалы ғәмәлдәр йылы тип иғлан итте, шуға күрә мин яңы йылға аяҡ баҫҡанда уҡ изге эштәрҙе башларға булдым, - тип йылмая Рәмзиә Кәримова.

Афарин, Рәмзиә! Ҡылған изге ғәмәлдәрең үҙеңә лә йөҙләтә әйләнеп ҡайтһын! Коллегабыҙҙың матур башланғысын дауам итеүселәр ҙә булыр әле...

Фото: Рәмзиә Кәримова