Луганск балалары Башҡортостан менән таныша

9 ғинуарҙа М. Аҡмулла исемендәге Башҡорт дәүләт педагогия университетында Луганск Халыҡ Республикаһынан килгән балалар өсөн  белем биреү сменаһы эш башланы.

Уҡыу йортона генерал-майор М.М. Шайморатов исемендәге 22-се Петровск мәктәбенән һәм Советтар Союзы Геройы С.Х. Хәсәнов исемендәге 29-сы Красный Луч мәктәбенән 32 ун беренсе класс уҡыусыһы һәм уҡытыусылар килде.

Уҡыу сменаһын асыу тантанаһы бөгөн М.Аҡмулла исемендәге Башҡорт дәүләт педагогия университетының Универсаль педагогик компетенциялар технопаркында уҙҙы. Унда Башҡортостан Республикаһының Юғары уҡыу йорттары ректорҙары советы рәйесе, БДПУ ректоры Салауат Тәлғәт улы Сәғитов, мәғариф һәм фән министры Айбулат Вәкил улы Хажин һәм Башҡортостан Республикаһы Башлығы Хакимиәтенең ижтимағи-сәйәси үҫеш идаралығының гражданлыҡ йәмғиәте институттары менән үҙ-ара эш итеү бүлеге мөдире Иршат Рим улы Ниязғолов ҡатнашты.

«2022 йылда беҙ ике мәктәп – Советтар Союзы Геройы Сафа Хәсәнов исемендәге 29-сы Красный Луч мәктәбе һәм генерал-майор Миңлеғәле Шайморатов исемендәге 22-се Петровский мәктәбе менән тығыҙ бәйләнеш булдырырға һәм дуҫлашырға килештек. Быйыл һеҙ кем булырға һәм ҡайҙа уҡырға барырға тигән мөһим ҡарар ҡабул итергә тейешһегеҙ. Башҡортостандың бөтә юғары уҡыу йорттары һеҙгә үҙ ишектәрен асырға әҙер», - тип мөрәжәғәт итте балаларға М. Аҡмулла исемендәге БДПУ ректоры Салауат Сәғитов.

 «Аҡмулла университетына һәм ректор Салауат Тәлғәт улы Сәғитовҡа был сменаны ойошторғандары өсөн рәхмәт белдерәм.  Былтыр йәй Башҡортостандың балалар лагерҙарында Луганск Халыҡ Республикаһынан мең ярым бала ял итте һәм быйыл да ошо традицияны дауам итәсәкбеҙ», - тине Башҡортостандың мәғариф һәм фән министры Айбулат Вәкил улы Хажин.

Советтар Союзы Геройы Сафа Хәсәнов исемендәге 29-сы Красный Луч мәктәбе директоры Елена Борзых ҡунаҡтар исеменән рәхмәт һүҙҙәре менән сығыш яһаны.

Балаларҙы бай эстәлекле белем биреү һәм күңел асыу программаһы көтә. Башҡорт дәүләт педагогия университеты уҡытыусылары һәм Башҡортостандың иң яҡшы уҡытыусылары улар өсөн медиатив технологияларға өйрәтәсәк һәм лидерлыҡ сифаттарын үҫтереү буйынса тренинг үткәрәсәк.

Шулай уҡ сменала ҡатнашыусылар «Салауат Юлаев» хоккей клубының оҫталыҡ дәрестәрендә ҡатнашасаҡ, рус лаптаһында уйнарға өйрәнәсәк, «Рәсәй - минең тарихым» тарихи паркында, Башҡортостан Республикаһының Милли музейында һәм Ҡыш бабайҙың ҡунаҡ тирмәһендә буласаҡ, ҡала буйлап экскурсия яһаясаҡ.

ЛХР уҡыусылары өсөн белем биреү сменаһы 14 ғинуарҙа тамамлана.

Фотолар: М. Аҡмулла исемендәге БДПУ-нан.