Барабансы, диджей, артист, спортсы, ғөмүмән, шәп студент!

Кәрим Миһранов – Өфө егете. Ул баш ҡалабыҙҙағы Республика инженер лицей-интернатын тамамлаған. Уҡыу алдынғыһы булыу менән рәттән, бала саҡтан спорт менән дуҫ була, айырыуса баскетболды үҙ итә. Лицейҙың баскетбол командаһы менән төрлө кимәлдәге ярыштарҙа ҡатнашып, алдынғы урындар яулайҙар.

Бөгөн Кәрим Мәскәү дәүләт милли тикшеренеүҙәр төҙөлөш университетында уҡый, буласаҡ инженер әлегә II курста белем ала. Университеттың йәмәғәт тормошонда ла әүҙем ҡатнаша, “Ижади оҫтахана”ла шөғөлләнә, ошондағы музыкаль төркөмдөң барабансыһы ла ул. Шулай уҡ Кәрим төрлө сараларҙа диджей, ойоштороусы булып сығыш яһай.

Мәскәү башҡорттарының “Илһам” театрына йөрөргә лә ваҡыт таба. Яңы йыл алдынан коллектив менән Башҡортостандың Мәскәүҙәге илселегендә “Ҡоҙаса” спектаклен ҡуйғандар. Кәрим төп ролде – Басирҙы башҡарған.

“Башҡортостан” гәзитенең төркөмөндә иғлан ителгән “Иң яҡшы студент” конкурсына Кәрим Миһранов Мәскәүҙәге “Башстудентс” ойошмаһы тарафынан күрһәтелде. Ул башҡорт йәштәрен берләштергән ойошма активында ла тора. Улар бергәләп төрлө саралар ойошторолар, туған төйәктә ситтә милли рухты һаҡлап, үҙҙәре өсөн башҡорт мөхите булдырып йәшәргә тырыша. Рухлы, алдынғы ҡарашлы, һәләтле егеткә уңыштар теләйбеҙ!

Фотолар: Кәрим Миһрановтың шәхси архивынан.