Башҡортса КВИЗ үтте

20 февралдә Өфөнөң фән һәм технологиялар университетының башҡорт филологияһы һәм журналистика факультеты базаһында башҡорт телендә КВИЗ үтте. Был сара 21 февралдә билдәләнәсәк халыҡ-ара туған телдәр көнөнә арналды.

Ҡатнашыусыларҙы башҡорт телен һаҡлау һәм үҫтереү буйынса фонд директоры Гөлназ Йосопова, Өфөнөң фән һәм технологиялар университетының башҡорт филологияһы, шәрҡиәт һәм журналистика факультеты деканы Гөлфирә Абдуллина тәбрикләне. 

КВИЗ-уйын Башҡортостан Башлығы гранты аҡсаһы иҫәбенә тормошҡа ашырыла. Бындай уйын икенсегә уҙғарыла. Тәүгеһе Рәми Ғариповтың тормошона һәм ижадына арналды. Бөгөнгө уйындың һорауҙары Салауат Юлаев, Шайморатов генерал, Алдар Иҫәкәев, Ҡаранай Моратов кеүек  башҡорт батырҙарының тормошонан алынды. Ойоштороусылар билдәләүенсә, башҡорт мәҙәниәте, әҙәбиәте, Урал батыр эпосы темалары буйынса тағы ла дүрт уйын ойоштороу ниәтләнә.

Уйын һөҙөмтәләре буйынса 1-се урынды «Әлләсе» , 2-се урынды «Ҡауырһын», 3-сө урынды «Йүрүҙән» командалары яуланы.