Абруйлы вузда 60 яҡташыбыҙ уҡый

Башҡортостан Башлығы Радий Хәбиров социаль селтәрҙәге сәхифәһендә Мәскәү дәүләт халыҡ-ара мөнәсәбәттәр институты (МГИМО) ректоры Анатолий Торкунов менән осрашыуы тураһында яҙып сыҡты.

“МГИМО ректоры Анатолий Васильевич Торкунов ошо вузда белем алған Башҡортостан студенттарының кимәлен юғары баһаланы.

Әле бында 60 егет һәм ҡыҙыбыҙ уҡый, улар һөҙөмтәле, ныҡлы, яҡшы әҙерлекле. Улар араһында Кәрим Хәкимов һәм башҡа билдәле дипломаттар кимәлендәге профессионалдар ҙа булыр, тип ышанам.

Мәскәү дәүләт халыҡ-ара мөнәсәбәттәр институтының үҙ пландары бар, юғары уҡыу йорто йылдам үҫә, һәм республикабыҙ студенттары, ҡағиҙә булараҡ, күп кенә проекттарҙа әүҙемлек күрһәтә.

Мин иһә Башҡортостандағы юғары белем һәм киләсәккә пландарыбыҙ хаҡында һөйләнем. Атап әйткәндә, Евразия ғилми-белем биреү үҙәгенең эшен һәм тиҙҙән студенттар кампусын төҙөүгә тотоноуыбыҙҙы телгә алдым. Мәскәү дәүләт халыҡ-ара мөнәсәбәттәр институтының бындай кампустары өсәү, һәм был тәжрибә беҙгә бик ҡыҙыҡлы.

МГИМО менән республикала кадрҙар ҡеүәтен үҫтереү мәсьәләләрендә хеҙмәттәшлек итәбеҙ, йәштәребеҙ күпләп ошо абруйлы вузда белем алһын өсөн был эште артабан да көсәйтәсәкбеҙ. Һуңынан студенттарыбыҙ ҡайтып, үҙебеҙҙә эшләргә теләһен өсөн мөмкин булғандың барыһын да эшләйбеҙ”, – тип яҙған Радий Хәбиров.

Фото: vk.com/wall413272232

Сығанаҡ: vk.com/wall413272232