Олимпиада башланыуға һанаулы ғына көндәр ҡалды

10 апрелдә Өфөлә Бөтә Рәсәй уҡыусыларының хоҡуҡ буйынса олимпиадаһының һуңғы этабы старт ала. Унда 287 ҡыҙ һәм егет ҡатнаша. Сараны ябыу тантанаһы “Башҡортостан” дәүләт концерт залында үткәрелә. Башҡортостан Башлығы Радий Хәбиров олимпиадала ҡатнашыусыларҙы сәләмләйәсәк һәм еңеүселәрҙе ҡотлаясаҡ, тип көтөлә.

Сара Өфө фән һәм технологиялар университетының Хоҡуҡ институтында ойошторола. Уҡыусылар яҙма һәм телдән үткәрелгән турҙарҙа ҡатнашасаҡ. Эштәрҙе һәм сығыштарҙы Рәсәйҙең әйҙәүсе юристары, шул иҫәптән М.В. Ломоносов исемендәге Мәскәү дәүләт университеты, Рәсәй Сит ил эштәре министрлығының Мәскәү дәүләт халыҡ-ара мөнәсәбәттәр институты һәм башҡа вуздар уҡытыусылары баһалаясаҡ.

Уҡыусыларҙы төбәктең мәҙәни мираҫы һәм тарихи урындары менән таныштырасаҡтар, музейҙарға алып барасаҡтар, тематик саралар ойоштороласаҡ. Педагогтар өсөн лекциялар һәм тематик экскурсиялар ҡаралған.

Олимпиада көндәлеге Өфө фән һәм технологиялар университеты сайтында баҫыласаҡ (https://uust.ru/law-olymp/)

Олимпиада финалын асыу, ябыу һәм башҡалар тура эфирҙа барасаҡ:

10 апрелдә (10.00-11.15, Өфө ваҡыты) – сараны асыу (трансляция: https://uust.ru/law-olymp/);

13 апрель (10.30-12.30, Өфө ваҡыты) – Уҡытыусы һәм остаз йылына арналған асыҡ лекция (трансляция: https://uust.ru/law-olymp/);

15 апрель (10.30-12.30, Өфө ваҡыты) – сараны тантаналы ябыу (трансляция: https://uust.ru/law-olymp/).

Фото: mgazeta.com