Уҡыу өсөн бөтә шарттар бар

Башҡортостан Башлығы Радий Хәбиров социаль селтәрҙәрҙә яңы яҙма менән уртаҡлашты.

“Өфөнөң Инорс биҫтәһендәге 51-се мәктәп – Волга буйы федераль округында иң ҙуры. 1650 урынға иҫәпләнгән, һәр параллелдә – алтышар класс.

Уны микрорайонда йәшәүселәр ныҡ көттө. Ҡайһы бер объектив сәбәптәр арҡаһында төҙөлөш оҙаҡҡа һуҙылды. Әммә бөтә ауырлыҡтар артта ҡалды. Хәҙер иһә ул – республикабыҙҙағы иң заманса белем биреү учреждениеларының береһе.

Киң коридорҙар, яҡты кластар, яңы мебель һәм ҡорамалдар, ҙур спорт залдары, медицина кабинеты, башланғыс звено өсөн айырым блок, ашхана – уңайлы шарттарҙа уҡыу өсөн бөтәһе лә бар.

Әйткәндәй, 51-се мәктәп – Өфөнөң иң боронғо белем усаҡтарының береһе, ә Калинин районында тәүге мәктәп һанала. Ул 1936 йылда айырым ҡала булған Черниковскта булдырылған. Бында бай традициялар һәм бик яҡшы профессиональ коллектив тупланған.

Барығыҙға ла уңыштар теләйем!” – тип яҙҙы Радий Хәбиров.

Фото һәм сығанаҡ: vk.com/radiyhabirov