Башҡорт гимназияларына Мортаза Рәхимов исеме бирелде

Хәҙер Күмертауҙағы 3-сө башҡорт республика гимназия-интернаты һәм Күгәрсен районының Мораҡ ауылындағы башҡорт гимназияһы республиканың беренсе Президенты исемен йөрөтәсәк. Тейешле ҡарарҙарға Башҡортостан Хөкүмәте Премьер-министры Андрей Назаров ҡул ҡуйҙы.

Күмертау гимназияһы исемде үҙгәртеүгә бәйле сығымдарҙы үҙенең бюджеттан тыш саралары иҫәбенә финанслай. Мораҡта тейешле сығымдар район бюджеты иҫәбенә атҡарыласаҡ, тиелә документта.

Күмертауҙағы белем усағы – республикалағы иң боронғо мәктәп-интернаттарҙың береһе. Ул 1959 йылда асылған. 1962 йылда мәктәп Юрий Гагарин исемен ала.

Башҡортостан Халыҡ мәғарифы министрлығы коллегияһы ҡарары менән 1993 йылда 2-се Күмертау мәктәп-интернаты эксперимент тәртибендә мәктәп-интернат-гимназия итеп үҙгәртелә. 1996 йылда учреждение республиканың көньяҡ төбәге райондары һәм Ырымбур өлкәһе өсөн 3-сө башҡорт гимназия-интернаты статусын ала.

Фото selskieogni.ru

Мәғлүмәт сығанағы: РБК-ӨФӨ