Балалар яҡшы, уңайлы, имен шарттарҙа уҡыһын!

Башҡортостан Республикаһы Хөкүмәте Премьер-министры Андрей Назаров муниципаль район һәм ҡала округы хакимиәте башлыҡтары менән яңы уҡыу йылы башланыуға мәктәптәрҙең әҙерлек мәсьәләһе буйынса кәңәшмә үткәрҙе.

Андрей Назаров билдәләүенсә, мәктәптәрҙең яңы уҡыу йылына әҙерлеге федераль власть органдары һәм республика Хөкүмәте контролендә.

- Мәктәптәр һаны буйынса илдә алдынғы урындарҙы биләйбеҙ. Беҙҙә 1288 мәктәп эшләй. 17 июлдән уларҙың әҙерлеген баһалау буйынса комиссия тикшереүҙәре башланды. Бөгөн баһалауға күрһәтелгән бөтә мәктәптәр ҙә әҙер тип танылды.

Иҫегеҙгә төшөрәм, баһа бөтә тейешле талаптарҙы, шул иҫәптән террорға ҡаршы яҡланғанлыҡты ла иҫәпкә алып уҙғарылды. Йыл һайын был маҡсаттарға республика бюджетынан 200 миллион һум аҡса бүленә. Хәүефһеҙ шарттар булдырыу һәм уҡыусыларҙың һаулығын һаҡлау – беҙҙең төп бурыс. Яңы уҡыу йылын республикала ярты миллиондан ашыу бала, шул иҫәптән 54 мең самаһы беренсе класс уҡыусыһы башлаясаҡ. Бынан тыш, 1 сентябрҙә Башҡортостан мәктәптәрендә Донбасстан 209 бала уҡый башлай, - тине сығышында республика Хөкүмәте Премьер-министры.

Мәктәптәрҙең яңы уҡыу йылына әҙерлеге тураһында Башҡортостан Республикаһының мәғариф һәм фән министры Айбулат Хажин һөйләне. Белем көнөнә арналған тантаналы линейкалар 1 сентябрҙә республиканың барлыҡ мәктәптәрендә лә үтәсәк, тип билдәләне ул.

Республикала мәктәп уҡыусыларының туҡланыуын ойоштороу буйынса эш дауам итәсәк. Башланғыс класс уҡыусыларҙың барыһы ла бушлай йылы аш менән тәьмин ителәсәк, шулай уҡ уҡыусыларҙың льготалы категориялары өсөн социаль ярҙам саралары һаҡланасаҡ. Уҡыусыларҙың льготалы категорияларына бушлай ҡайнар аш биреүҙе ойоштороу өсөн 2023 йылда 3,6 миллиард һум, шул иҫәптән Башҡортостан бюджетынан 1,6 миллиард һум бүленгән.

Министрлыҡ йыл һайын үткәрелгән мониторинг сиктәрендә, шулай уҡ ведомство ҡарамағындағы белем биреү ойошмалары объекттарына күсмә тикшереүҙәр формаһында республика белем биреү объекттарының террорға ҡаршы хәүефһеҙлеген тәьмин итеү өлкәһендә Рәсәй Федерацияһы ҡануниәтен үтәүҙе даими контролдә тота.

Юл хәрәкәте хәүефһеҙлеге өлкәһендә иҫкәртеү эше Башҡортостан Республикаһының Дәүләт автоинспецияһы менән тығыҙ хеҙмәттәшлектә алып барыла. Йәйге каникул алдынан республиканың барлыҡ белем биреү ойошмаларында «Иғтибар - балалар!» республика иҫкәртеү акцияһы үткәрелде.

2023 йылдың 1 июненә ҡарата уҡыусыларҙы йөрөтөүгә 1522 мәктәп автобусы йәлеп ителгән. Шулай уҡ республика бюджеты иҫәбенә өҫтәмә автобустар һатып алына. 2023 йылда республиканың Мәғариф һәм фән министрлығы төбәк бюджеты аҡсаһына 18 мәктәп автобусы һатып алған. Бынан тыш, 2023 йылда Рәсәй Федерацияһы Хөкүмәте бойороғона ярашлы 49 мәктәп автобусы бүленгән. Мәктәп автобустары ГЛОНАСС йәки ГЛОНАСС/ GPS юлдаш навигацияһы аппаратураһы менән йыһазландырылған һәм тахографтар менән йыһазландырылған.

Республикала мәктәптәрҙе яңыртылған стандарттарға тап килгән дәреслектәр менән тәьмин итеү буйынса әүҙем эш алып барыла. Мәктәп китапханалары фондын яңыртыу буйынса маҡсатлы эш һөҙөмтәһендә дәреслектәр һәм уҡытыу саралары һатып алыуға сығымдар өлөшөндә норматив арттырылды. 2023 йылдың 1 ғинуарынан алып бер уҡыусыға иҫәптә норматив 2500 һум тәшкил итә. Башҡортостан Республикаһының барлыҡ мәктәптәре дәреслектәр менән тулы күләмдә тәьмин ителгән.

Рәсәй Федерацияһының Мәғариф министрлығы 10-сы, 11-се кластар өсөн тарих буйынса яңыртылған дәреслектәр әҙерләгән. Башҡортостан Республикаһының Мәғариф һәм фән министрлығы берҙәм тарих дәреслеге менән тәьмин итеүҙең социаль-сәйәси әһәмиәтен иҫәпкә алып, 10-сы, 11-се кластар өсөн Рәсәй тарихы һәм республикабыҙҙың бөтә мәктәптәре, шулай уҡ Луганск Халыҡ Республикаһының Красный Луч ҡалаһы мәктәптәре өсөн дәреслектәр һатып алыу тураһында ҡарар ҡабул ителде. Был маҡсаттарға Башҡортостан Республикаһының резерв фондынан 51 миллион һум самаһы күләмендә өҫтәмә финанс средстволары ҡайтарылды.

Мәктәптә хеҙмәт тәрбиәһе индереүгә бәйле мөһим үҙгәрештәр буласаҡ. Рәсәй Федерацияһы Президенты был хаҡтағы законға 4 августа ҡул ҡуйҙы. Законда тәрбиә төшөнсәһе уҡыусыларҙа эшһөйәрлек, хеҙмәткә яуаплы мөнәсәбәт булдырыу бурыстары менән байытылған. Уҡыусыларҙы эшкә йәлеп итеү мәктәптә тәртип һәм таҙалыҡ булдырыуға, мәктәп яны участкаһын биҙәүгә, мәктәп музейҙарында, театрҙарҙа, китапханаларҙа эшләүгә лә ҡағыласаҡ.

Яңы уҡыу йылынан йәнә бер мөһим яңылыҡ көтөлә: көмөш миҙал ҡайтарыла. Рәсәйҙең мәғариф министры Сергей Кравцов белдереүенсә, көмөш миҙалды аттестатта ике «дүртле» билдәһенә эйә булған уҡыу алдынғылары аласаҡ.

Белем биреү эшмәкәрлеген тормошҡа ашырған ойошмаларҙың әҙерлеген баһалау буйынса эш 2023-2024 уҡыу йылы башына тулы күләмдә тамамланған.

Андрей Назаров муниципаль район һәм ҡала округтары хакимиәттәренә ғәҙәттән тыш хәл һәм янғын осрағында белем биреү ойошмаларының хәүефһеҙлеген; санитар нормаларҙы һәм ҡағиҙәләрҙе үтәүҙе; мәктәптәрҙең криминаль характерҙағы хәүефтәрҙән хәүефһеҙлеген тәьмин итергә ҡушты.

Айрат Нурмөхәмәтов фотоһы.