Белем көнөндә ямғыр яуырмы?

Мәктәп уҡыусыларының көтөп алған оҙайлы йәйге каникулы тамамланыуға һанаулы ғына көндәр ҡалды. 1 сентябрҙә республика мәктәптәре тағы ла балаларҙың шат тауышына күмеләсәк.

Белем көнөн айырыуса 1-се класҡа барған кескәй ҡыҙҙар һәм малайҙар ашҡынып көтә. Ата-әсәләр ҙә уларҙан кәм тулҡынланмай. Бала тормошонда бер тапҡыр ғына була торған иҫтәлекле көн бит.

Ә бына тәбиғәт быйыл был көндә йылы, сыуаҡ һауа торошо менән ҡыуандырырмы икән? Үкенескә ҡаршы, тип әйтәйекме, республика биләмәһендә башланып торған йонсоу көндәр дауам итәсәк. 1 сентябрҙә лә республиканың күпселек төбәктәрендә синоптиктар ямғыр вәғәҙәләй. Һауа температураһы +13...+16 градус арауығында буласаҡ.

Уның ҡарауы бер нисә көндән, аныҡлабыраҡ әйткәндә, 3 сентябрҙән һауа торошо яҡшыра – ямғырҙар туҡтай, көндөҙгө һауа температураһы +19...+23 градусҡаса йылынасаҡ.

“Тәбиғәттең насар миҙгеле булмай” тигәндәй, иң мөһиме – күңелегеҙ күтәренке булһын!

Фото: stihi.ru