Уҡыусылар һәм студенттар “Нимә? Ҡайҙа? Ҡасан?” уйынында ҡатнашты

“Белем. Уйын” чемпионаттары серияһының “Нимә? Ҡайҙа? Ҡасан?”: мәктәптәр һәм колледждар” төбәк этабы 17 апрелдә Өфө вуз-ара студенттар кампусы майҙансығында үтте.

Төбәк финалында республика колледждарынан ете команда һәм мәктәптәрҙән ете команда ҡатнашты. Балалар Стәрлетамаҡтан, Нефтекаманан, Белореттан, Октябрьскийҙан, Межгорье ябыҡ административ-территориаль берәмегенән, Өфөнән һәм Ҡырғыҙ-Миәкә ауылынан йыйылды.

Төбәк финалына 14 команда сыҡты, уларҙы Башҡортостан Республикаһының мәғариф һәм фән министры урынбаҫары Инесса Косолапова, Башҡортостан Республикаһының Йылдам һөнәри әҙерлек үҙәге директоры Кира Ғәләмова һәм «Белем» Рәсәй йәмғиәтенең Башҡортостан филиалы директоры Диана Вәлиева сәләмләне.

«Республикала уйындар тәүге йыл ғына ойошторолмай, командалар һаны йылдан-йыл арта бара. Уйындар - интеллектуаль сара, улар аң даирәһен, эрудицияны, зирәклекте үҫтерә. Уҡыусылар команда менән үҙ-ара килешеп эш итергә, ҡуйылған бурыстарҙы бергәләп хәл итергә өйрәнә. Ә мәктәп һәм колледж командаларының бергә ҡатнашыуы күсәгилешлелек тәрбиәләй», - тине Башҡортостан Республикаһының мәғариф һәм фән министры урынбаҫары Инесса Косолапова.

Башҡортостан Республикаһының иң көслө командалары тип Стәрлетамаҡ химия-технология колледжы командалары танылды, икенсе һәм өсөнсө урындарҙы Октябрьский ҡалаһының 12-се һәм 9-сы мәктәптәре уҡыусылары яуланы.

Уйын Волга буйы федераль округынан бөтә командалар өсөн бер үк ваҡытта үтте, уның йомғаҡтары буйынса һәр төбәктә еңеүселәр билдәләнде. Еңеүселәрҙең һөҙөмтәләре буйынса рейтинг эшләнә, уның нигеҙендә Мәскәүҙә финалда округ исеменән сығыш яһаясаҡ дүрт иң көслө команда билдәләнә.

Иң яҡшыларҙы Мәскәүҙә «Рәсәй» халыҡ-ара күргәҙмә-форумында көтәләр. Тап шунда, майҙа чемпионаттың төп финалы ойошторола. Унда бөтә илдән 75 команда ҡатнаша.

Фото һәм сығанаҡ: pravitelstvorb.ru