Мәскәү ғалимы Өфөләге кампусҡа юғары баһа бирҙе

Өфөлә Ю.М. Лопухин исемендәге Федераль физик-химик медицина ғилми-клиник үҙәге генераль директорының үҫеш буйынса урынбаҫары, Рәсәй Фәндәр академияһының ағза-корреспонденты, медицина фәндәре докторы Елена Загайнова Евразия ғилми-тикшеренеү үҙәге ғалимдары һәм студенттары менән осрашты. Елена Вадимовна вуз-ара студенттар кампусының алдынғы профилле лабораторияларында, шулай уҡ Рәсәй Һаулыҡ һаҡлау министрлығының Башҡорт дәүләт медицина университетының Фундаменталь медицина институтында булды. Федераль эксперт Башҡортостан фәнни инфраструктураһына юғары баһа бирҙе.

– Һеҙҙә фән дә, белем биреү процестары ла, индустрия менән яҡшы бәйләнеш тә бар. Кампус – аралашыу, эшләү майҙансығы. Фәнде үҫтереү, партнерҙарға килеп ошонда етештерелгән нәмәләрҙе ҡарау һәм заказ биреү мөмкинлеген биргән лабораториялар ҙа уңышлы эшләй, – тип билдәләне Елена Загайнова.

Өфөгә сәфәре барышында ул Евразия ғилми-белем биреү үҙәгенең Лекторий майҙансығында сығыш яһаны. Елена Вадимовна тыңлаусыларға фундаменталь медицинала һәм клиник практикала биоимиджинг тураһында һөйләне.

"ЛекторийНОЦ" проекты эшләй башлағандан алып республикала 30-ҙан ашыу ғалим сығыш яһаған, 7 мең 500-ҙән ашыу кеше көндөҙгө форматтағы тыңлаусы булған, 56 мең 500-ҙән ашыу ҡатнашыусы онлайн ҡушылған.

Фото: Евразия ғилми-тикшеренеү үҙәге.