2026 йылда ремонт эштәре башланасаҡ

5 ноябрҙә Иглин районына эш сәфәре барышында Башҡортостан Башлығы Радий Хәбиров Иглин ауылындағы Башҡортостан агросәнәғәт колледжы филиалында булды. Уҡыу йорто тракторсы-машинистар, иретеп йәбештереүселәр, малярҙар, автомобиль ремонтлау буйынса слесарҙар, ауыл хужалығы производствоһы мастерҙарын әҙерләй. Колледж студенттары Рәсәй һәм төбәк профессиональ оҫталыҡ чемпионаттарында әүҙем ҡатнаша. Сит ҡаланан килеүселәр өсөн ике ҡатлы ятаҡ та бар.

Филиал мөдире Рәмзил Байназаров аңлатыуынса, уҡыу корпусы һәм студенттар өсөн ятаҡ биналары 1962 йылда төҙөлгән. Улар капиталь ремонт талап итә.

Башҡортостан Башлығы уҡыу кластарын, ятаҡты, ашхананы һәм спорт залын ҡараны. Радий Хәбиров студенттар менән аралашҡанда эшсе һөнәрҙәрҙең бик кәрәкле булыуын билдәләне һәм уларға юғары квалификациялы белгестәр булыуын теләне.

Төбәк етәксеһе учреждение етәкселеге менән бинаны яңыртыу буйынса пландарҙы ла тикшерҙе. Радий Хәбиров республиканың Мәғариф һәм фән министрлығына 2026 йылда Башҡортостан агросәнәғәт колледжының Иглин филиалында капиталь ремонт башларға ҡушты.

Фото: glavarb.ru