Кампуста сит ил студенттары стартап проекттар эшләй

Башҡорт дәүләт медицина университетының 150-нән ашыу сит ил студенты Вуз-ара студенттар кампусы майҙансығында «Студент стартапы» грантын алыуға конкурста ҡатнашыу өсөн проекттар әҙерләү буйынса белем биреү интенсивын үтте.

Шуны ла билдәләп үтәйек, икенсе йыл инде студенттар стартап проекттарына конкурс заявкаларын Рәсәй вуздарында уҡыған сит ил студенттары ла бирә ала. Проект саралары “Университет технологик эшҡыуарлығы платформаһы” федераль проекты һәм “Приоритет-2030” үҫеш программаһы сиктәрендә үткәрелә.

Биш көн дауамында Рәсәй Һаулыҡ һаҡлау министрлығының БДМУ студенттары үҙ проекттарын әҙерләү һәм камиллаштырыу өҫтөндә эшләне, көн һайын уларҙы эксперт комиссияһы алдында яҡланы. Эшҡыуарлыҡ өлкәһендәге эксперттар тәҡдим ителгән идеяларҙы баһаланы, проекттарҙың фәнни нигеҙлелеген яҡшыртыу буйынса тәҡдимдәр һәм кәңәштәр бирҙе.

Улар медицина мобиль ҡушымтаһы, тауыш тәржемәсеһе, «аҡыллы» видеокүҙәтеү камералары, йорт һаулыҡ һаҡлау хеҙмәте һәм башҡа проекттарҙы экспертизаға сығарҙы.

БДМУ-ның Инновацион эшмәкәрлек идаралығы башланғысы һәләтле студенттарға ярҙам итеүгә йүнәлтелгән һәм илдә инновацион эшҡыуарлыҡты һәм фәнни тикшеренеүҙәрҙе үҫтереүгә булышлыҡ итә. Сит ил студенттарының ҡатнашыуы Рәсәйҙең Халыҡ-ара хеҙмәттәшлек һәм белем менән алмашыу өсөн асыҡ булыуын һыҙыҡ өҫтөнә ала.

Хәтерегеҙгә төшөрәбеҙ, Башҡортостан «Студент стартапы» конкурсында юғары позициялар биләй. 2024 йылда республиканан 400-ҙән ашыу студент ғариза биргән һәм уларҙың 120-һе еңеүсе булған. Бөтә призерҙар ҙа үҙ проектын тормошҡа ашырыу өсөн берәр миллион һум алды. Ҡатнашыусылар һаны буйынса Башҡортостан Рәсәйҙең тәүге биш төбәге иҫәбенә инде.

Белешмә. Евразия Фәнни-белем биреү үҙәгенең юғары уҡыу йорттары араһындағы студенттар кампусы Рәсәй Президенты ҡушыуы буйынса һәм Рәсәй Мәғариф һәм фән министрлығының «Фән һәм университеттар» милли проектын тормошҡа ашырыу сиктәрендә төҙөлә. Өфө кампусы проекты - 4,3 мең кешегә иҫәпләнгән торлаҡ биналары, уҡыу-ғилми комплексы, лабораториялары, эшлекле зоналары, магазиндары, уңайлы скверҙары һәм башҡа уңайлы ҡала мөхите объекттары булған студенттар өсөн урын.

Мәғлүмәт һәм фото сығанағы: https://pravitelstvorb.ru/news/26077/