“Беренселәр хәрәкәте”нең IV съезын асыуҙа ҡатнаштылар

Рәсәй Президенты Владимир Путин 26 мартта “Беренселәр хәрәкәте”нең IV съезын асыу тантанаһында ҡатнашты. Дәүләт башлығы төрлө төбәктәрҙән съезда ҡатнашыусыларҙы һәм ҡунаҡтарҙы “Рәсәй” милли үҙәгендә сәләмләне. Ул шулай уҡ хәҙерге йәштәрҙе тәрбиәләүҙә “Беренселәр хәрәкәте”нең әһәмиәтен билдәләне.

“Беренселәр хәрәкәте”ндә 11 миллиондан ашыу кеше ҡатнаша. Мин һеҙҙе тәбрикләйем. Иң төп бурыстарҙың береһе – йәштәргә, үҫеп килгән быуынға тормошта үҙ урындарын табырға ярҙам итеү”, – тине Владимир Путин.

Башҡортостандан съезда 13 муниципаль район һәм ҡала округынан 22 әүҙемсе, шулай уҡ дүрт остаз ҡатнашты.

Атап әйткәндә, 27 мартта “Беренселәр хәрәкәте” съезы ултырышы, шулай уҡ Хәрәкәттең ғилми-методик советы ултырышы үтәсәк. “Рәсәй” милли үҙәге майҙансығында Бөтә донъя театр көнөнә арналған саралар ҙа ойоштороласаҡ. Ә 28 мартта иһә съезды ябыу тантанаһы уҙа.

Фото:“Беренселәр хәрәкәте”нең матбуғат хеҙмәте.