Һоҡланғыс йәштәребеҙ күп

11 сентябрҙә Өфөлә Башҡортостан Башлығы Радий Хәбиров республиканың урта профессиональ уҡыу йорттарының студенттар үҙидараһы лидерҙары менән осрашты. Улар власть органдары менән үҙ-ара эш итеүгә өйрәнә, шулай уҡ СПО студенттары лидерҙары мәктәбе сиктәрендә кеше-ара аралашыу тәжрибәһе ала. Сара Донъя кимәлендәге Евразия фәнни-белем биреү үҙәгенең (НОЦ) вуз-ара Кампусының Геном үҙәге базаһында үтте.

Осрашыу башында төбәк етәксеһе республика һәм ил иҡтисады өсөн урта һөнәри белем биреү системаһының әһәмиәтен һыҙыҡ өҫтөнә алды.

– Минең өсөн һеҙҙең менән һөйләшеү бик мөһим. Республика колледждарында 120 меңгә яҡын бала уҡый. Беҙгә һеҙҙең нимә менән йәшәүегеҙҙе, ниндәй кәйефтә булыуығыҙҙы аңлау мөһим. Һеҙ – беҙҙең партнерҙар. Һеҙҙең аша дөрөҫ ориентирҙар тапшыра һәм ҡиммәттәр формалаштыра алабыҙ, – тип билдәләне Радий Хәбиров. – Беҙ махсус белем биреү учреждениелары уҡыусыларын уҡытыу һәм йәшәү өсөн лайыҡлы шарттар булдырырға тейешбеҙ, сөнки тап улар республика иҡтисадын үҫтереүҙе тәьмин итәсәк.

Колледждарҙы яңыртыуға йыл һайын республика бюджетынан 500 миллион һум самаһы аҡса бүленә – оҫтаханалар, уҡыу кластары һәм ятаҡтар ремонтлана, тип билдәләне Башҡортостан Башлығы. Бынан тыш, төбәктең 27 урта һөнәри белем биреү учреждениеһы “Йәштәр һәм балалар” милли проектының “Профессионалитет” федераль программаһында ҡатнаша, шуның арҡаһында өҫтәмә финанслау ала.

Осрашыуҙа йәштәр студенттарҙың үҙидара системаһын яҡшыртыу буйынса үҙ башланғыстарын тәҡдим итте, шул иҫәптән был өлкәлә колледждар өсөн берҙәм орган булдырырға тәҡдим итте. Бындай структура республиканың юғары уҡыу йорттарында эшләй һәм бөтә студенттар советтарын берләштерә.

Радий Хәбиров был идеяны хупланы һәм Башҡортостанда бындай майҙансыҡтарҙы уңышлы ойоштороу тәжрибәһе барлығын билдәләне.

– Бер нисә йыл элек беҙ урта һөнәри белем биреү буйынса Республика советын ойошторҙоҡ. Йылына ике тапҡыр колледж директорҙары менән осрашабыҙ, көнүҙәк мәсьәләләрҙе тикшерәбеҙ һәм ҡарарҙар ҡабул итәбеҙ, – тип һөйләне төбәк етәксеһе.

Тағы бер проект – ижади индустрия өлкәһендәге инициативалар акселераторы була алған ижади йәрминкә булдырыу. Яңы майҙансыҡ үҙ идеяларын тәҡдим итергә, эксперттарҙан белем алырға һәм эшҡыуарҙарҙың иғтибарын йәлеп итергә мөмкинлек бирәсәк. Радий Хәбиров был мәсьәләне тормошҡа ашырыуҙа ярҙам итеү өсөн эшләргә ҡушты.

Шулай уҡ егет һәм ҡыҙҙар бәләкәй курс студенттарын өлкән курс студенттары көсө менән яраҡлаштырыу программаһын башларға тәҡдим итте. Республика Башлығы, был кәрәкле һәм дөрөҫ башланғыс, тип билдәләне.

– Беренсе курс студенттары – балалар. Һәм уларҙың күбеһе тыуған йортоноң стеналарын беренсе тапҡыр ташлап, стресс кисерә. Әлбиттә, уларға өлкән иптәштәребеҙҙең ярҙамы кәрәк, – тине Радий Хәбиров.

Артабан осрашыу “һорау-яуап” форматында дауам итте. Мәҫәлән, Өфө радиоэлектроника, телекоммуникациялар һәм хәүефһеҙлек колледжы студенттары “РВ-1” радиоэлектрон технопаркын асыу ваҡыты менән ҡыҙыҡһынды. Радий Хәбиров проектты Рәсәйҙең Сәнәғәт һәм сауҙа министрлығы ярҙамында тормошҡа ашырыуҙары хаҡында хәбәр итте.

– Технопарк төҙөлөшөн тамамларға, унда заманса ҡорамалдар ҡуйырға тейешбеҙ. 2026 йылда был майҙансыҡ тулы ҡеүәтенә эшләй башлаясаҡ, тип планлаштырабыҙ, – тине республика Башлығы.

Осрашыуҙа ҡатнашыусылар шулай уҡ транспорт тәьминәте, һөнәри белем биреү инфраструктураһын үҫтереү, торлаҡ мәсьәләләрен хәл итеү механизмдарын тикшерҙе.

Радий Хәбиров балаларға һөҙөмтәле аралашыуҙары һәм әүҙем тормош позицияһы өсөн рәхмәт әйтте.

– Башҡарған эшегеҙ бик мөһим. Һеҙгә ошо миссияла һәм бөтә эштәрегеҙҙә уңыштар теләйем, – тине төбәк етәксеһе. - Ысын профессионалдар булып китегеҙ һәм яҡшы кешеләр булығыҙ. Уңыштар!

Сараға йомғаҡ яһап, Башҡортостан Башлығы, йәштәр менән осрашыуҙар – төбәктең идара итеү командаһы эшенең мөһим өлөшө, тине.

- Студенттар колледждарҙағы ижтимағи тормошто нисек һөҙөмтәлерәк итеү, беренсе курс студенттарына нисек ярҙам итеү, яҡшы эмоциональ, әхлаҡи мөхит булдырыу тураһында бер нисә тәҡдим индерҙе. Был идеяларҙың ҡайһы берҙәрен эшкә алдыҡ, – тине Радий Хәбиров. - Беҙҙә иҫ киткес йәштәр бар. Һәм беҙ балалар өсөн лайыҡлы шарттар булдырыуҙы дауам итәсәкбеҙ.

Фото: Башҡортостан Башлығы сайты.