Вуз-ара кампуста креатив индустриялар класы асылды

Вуз-ара кампуста креатив индустриялар класы асылды

Башҡортостанда яңы белем биреү проекты – “Креатив индустриялар класы” эшләй башланы. Уны Иҡтисади үҫеш министрлығы һәм республиканың Стратегик үҫеш үҙәге менән берлектә Өфө дәүләт нефть техник университетының Бизнес һәм креатив индустриялар экосистемаһы институты тормошҡа ашыра.

Уҡытыу ике йылға иҫәпләнгән, практик, оҫталыҡ дәрестәре, проект эштәрен үҙ эсенә ала. Уҡытыу өс майҙансыҡта – Евразия фәнни-белем үҙәгенең Вуз-ара кампусында, ӨДНТУ-ла һәм ҡатнашыусы мәктәптәрҙә ойошторола. Программа ижади һәләттәрҙе һәм професиональ компетенцияларҙы булдырыуҙы берләштерә. Уҡыусылар сәнғәт, дизайн, медиа һәм технологияларҙың төрлө йүнәлештәрендә үҙҙәрен һынай, команда эшенә, коммуникацияға, публика алдында сығыш яһарға өйрәнә, киләсәк индустрияһында кәрәкле техник инструменттарҙы үҙләштерә ала.

Беренсе ағымда Ҡ.А. Дәүләткилдеев исемендәге республика художество гимназия-интернаты, Өфөнөң 126-сы мәктәбе, М.А. Ферин исемендәге 60-сы лицей уҡыусылары ҡатнаша. Шулай уҡ Бөрө ҡалаһы лицейы уҡыусылары Өфөгә айына бер тапҡыр килеп уҡыясаҡ.

Һәр класҡа айырым модулдәр менән уҡыу планы төҙөлгән.

 Улар араһында:

• "Аҡыллы ҡала" - һанлы технологиялар ҡалаларҙың проблемаларын хәл итергә һәм йәшәү сифатын яҡшыртырға ярҙам итә.
• "Ижади индустрияларҙа идара итеү" -дәүләт һәм муниципалитеттарҙың арт-проекттарға, дизайн һәм медиаға ярҙам итеүе менән танышыу.
• "Иҡтисади һәм мәғлүмәти хәүефһеҙлек” - интернетта шәхси мәғлүмәттәрҙе, финанс һәм хәүефһеҙ тәртип ысулдарын һаҡлау.
• "Креатив туризм һәм ҡунаҡсыллыҡ" - төбәктең туристик потенциалын өйрәнеү, маршруттар һәм экскурсия программаларын проектлау.
• "Дипломатия һәм халыҡ-ара коммуникациялар” - дипломаттар, киң мәғлүмәт саралары һәм илдәр араһында мәҙәни бәйләнештәр нисек эшләй.
• “Креатив мода” VR/AR-технологияларҙы ҡулланып кейем проектлау һәм “Кибер-ателье” лабораторияһында һанлы аватарҙар булдырыу.
• "Гастрономик креатив һәм аҙыҡ-түлек технологиялары” - молекуляр аш-һыу, zero-waste-алымдар һәм аҙыҡ-түлек химияһы.
• "Креатив индустрияларҙың хәрәкәт итеүсе көсө булараҡ дизайн" - эргономика һәм уның уңайлы мөхит булдырыуҙағы роле.
• "Креатив индустрияларҙа проект эшмәкәрлеге" - идеянан алып әҙер продуктҡа тиклем креатив проекттар эшләү һәм тормошҡа ашырыу.
• “Креатив индустрияларҙа иҡтисад һәм эшҡыуарлыҡ" - бизнес нигеҙҙәре һәм интеллектуаль милек менән эшләү.

Дәрестәрҙе Өфө нефть университеты уҡытыусылары үткәрә. Эшкә юғары уҡыу йорто студенттары ла ҡушыла, улар уҡыусыларға дисциплиналарҙы үҙләштереүҙә ярҙам итә. Уҡыу йомғаҡтары буйынса уҡыусылар үҙ проекттарын яҡлаясаҡ.

Белешмә

Евразия Фәнни-белем биреү үҙәгенең юғары уҡыу йорттары араһындағы студенттар кампусы Рәсәй Президенты ҡушыуы буйынса һәм Рәсәй Мәғариф һәм фән министрлығының «Фән һәм университеттар» милли проектын тормошҡа ашырыу сиктәрендә төҙөлә. Өфө кампусы проекты - 4,3 мең кешегә иҫәпләнгән торлаҡ биналары, уҡыу-ғилми комплексы, лабораториялары, эшлекле зоналары, магазиндары, уңайлы скверҙары һәм башҡа уңайлы ҡала мөхите объекттары булған студенттар өсөн урын.   2030 йылға илдә 25 кампустан торған селтәр барлыҡҡа килергә тейеш. Был йүнәлеш буйынса эште РФ Хөкүмәте һәм Рәсәй Мәғариф һәм фән министрлығы алып бара. Әлеге ваҡытта “Йәштәр һәм балалар” милли проекты ярҙамында 24 ошондай студент ҡаласығы проектлана һәм төҙөлә. 2036 йылға кампустар һаны 40-ҡа тиклем артасаҡ.

Мәғлүмәт һәм фото сығанағы: https://pravitelstvorb.ru/news/27568/