Икенсе тапҡырға чемпион!

Өфө фән һәм технологиялар университеты командаһы  Вуз-ара студенттар кампусы исеменән сығыш яһап, икенсе тапҡыр Counter-Strike 2 дисциплинаһында Сбер киберспортының Милли студенттар лигаһында еңеү яуланы.  Был һөҙөмтә турнир тарихында уны берҙән-бер ике тапҡыр чемпион яһаны.  

 2025 йылдың өсөнсө миҙгелендә 2,64 миллион һумлыҡ приз фонды өсөн илдең 48 вузы һәм урта махсус уҡыу йорттары көрәште. Өфөләр финалда  2:0 иҫәбе менән Себер федераль университеты командаһын еңде.

Университеттың киберспорт секторы етәксеһе Роман Кәшфуллин билдәләүенсә, еңеү вуздың был спорт төрөндә  юғары потенциалға эйә  булыуын һәм уны артабан үҫтереүҙең мөһимлеген раҫлай. Башҡортостан фән һәм юғары белем буйынса дәүләт комитеты етәксеһе Светлана Мостафина әйтеүенсә, вуздың уңышы республика йәштәрен киберспортта күнекмәләрҙе камилләштереүгә дәртләндерә, был үҙ йәһәтендә һанлы иҡтисад өсөн кадрҙар әҙерләүгә ярҙам итә.

Фото: Башҡортостан Хөкүмәте сайтынан.

.