Өфө кампусы резиденты технологик эшҡыуарлыҡты үҫтерәсәк

Технологик эшҡыуарлыҡ өлкәһендә үҙ-ара эш итеү буйынса юл картаһын вуз-ара кампус резиденты, Өфө дәүләт нефть техник университеты һәм Газпромбанктың Өфө дирекцияһы раҫланы. Тантаналы ҡул ҡуйыу кампуста үтте. Юл картаһы саралары планында юғары уҡыу йорттары хеҙмәткәрҙәрен дә, студенттарҙы ла йәлеп иткән тиҫтәнән ашыу проект бар. Мәҫәлән, тәүгеләр өсөн берлектәге белем биреү программаһын әҙерләйҙәр һәм техник эшҡыуарлыҡ буйынса база кафедраһын асалар. Студенттар һәм йәш ғалимдарға технологик лидерлыҡ клубына инеү мөмкинлеге бар. Бынан тыш, Газпромбанктың акселерация программаларында ҡатнаша, бизнес-идеялар һөҙөмтәләре буйынса булдырылған юридик шәхестәргә комплекслы банк хеҙмәтләндереүе рәүешендә ярҙам ала аласаҡтар. Шулай уҡ тематик конференция ойоштороу һәм индустриаль партнерҙың инвестиция фондтары менән үҙ-ара эш итеү планлаштырыла.

  - Ил Президенты илдең технологик лидерлығын тәьмин итеү бурысын ҡуйҙы, ә беҙ “Өҫтөнлөк-2030” университеттарҙы үҫтереү буйынса федераль программаның төп партнеры булып торабыҙ. Беҙ стандарт булмаған яңы проекттар эҙләйбеҙ һәм нефть университетында тыуған идеяларҙы хупларға әҙербеҙ. Бөтә ил буйынса ӨДНТУ-ла тормошҡа ашырыла алған ғәҙәти булмаған эшләнмәләр бар, һәм, киреһенсә, нефть университеты  студенттары һәм аспиранттарының проекттары яңы продукттар, технологиялар, бизнес булдырыу, тимәк, технологик лидерлыҡҡа өлгәшеү өсөн файҙаланыла алыр ине, - тине Газпромбанктың Өфө дирекцияһы директоры Айҙар Зөбәйеров.

ӨДНТУ ректоры Олег Баулин билдәләүенсә, Өфө нефть университеты – илдә технологик эшҡыуарлыҡты үҫтереү буйынса лидерҙарҙың береһе һәм улар үҙ-ара эш итергә әҙер.
 

Белешмә

Евразия Фәнни-белем биреү үҙәгенең юғары уҡыу йорттары араһындағы студенттар кампусы Рәсәй Президенты ҡушыуы буйынса һәм Рәсәй Мәғариф һәм фән министрлығының «Фән һәм университеттар» милли проектын тормошҡа ашырыу сиктәрендә төҙөлә. Өфө кампусы проекты - 4,3 мең кешегә иҫәпләнгән торлаҡ биналары, уҡыу-ғилми комплексы, лабораториялары, эшлекле зоналары, магазиндары, уңайлы скверҙары һәм башҡа уңайлы ҡала мөхите объекттары булған студенттар өсөн урын.   2030 йылға илдә 25 кампустан торған селтәр барлыҡҡа килергә тейеш. Был йүнәлеш буйынса эште РФ Хөкүмәте һәм Рәсәй Мәғариф һәм фән министрлығы алып бара. Әлеге ваҡытта “Йәштәр һәм балалар” милли проекты ярҙамында 24 ошондай студент ҡаласығы проектлана һәм төҙөлә. 2036 йылға кампустар һаны 40-ҡа тиклем артасаҡ.

Мәғлүмәт һәм фото сығанағы: https://pravitelstvorb.ru/news/