Сит ил абитуриенттары өсөн дә ҡыҙыҡтырғыс

Евразия фән-белем биреү үҙәге ҡатнашыусыһы ‎Өфө дәүләт нефть техник университеты нефть-газ эше буйынса «Petroleum Engineering» инглиз теле программаһының тәүге магистрҙарын сығарҙы. Был программаның үҙенсәлеге шунда - уҡыу тулыһынса инглиз телендә алып барыла. 

Дисциплиналарҙы ӨДНТУ-ның  махсус тел әҙерлеген үткән уҡытыусылары, шулай уҡ техник инглиз телен белгән индустрия белгестәре алып бара.

– Инглиз теле программаһын төрлө илдәрҙән студенттарҙы һәм уҡытыусыларҙы берләштерә һәм техник инглиз  теле кимәлен күтәрергә булышлыҡ итә. ‎Беҙҙең вуз-резидент мәғариф өлкәһендәге халыҡ-ара хеҙмәттәшлек буйынса әүҙем эшләй, - ти "БР фәнни мәғариф үҙәге" коммерция нигеҙендә булмаған ойошмаһы директоры Андрей Кулаков. ‎

«Petroleum Engineering» магистр программаһы — ошо уҡ исем аҫтындағы 2020 йылда башланған бакалавриат программаһының логик дауамы. Ул ваҡытта ул ‎Рәсәйҙә профилле техник уҡыу йорттары араһында нефть-газ эше өлкәһендә белгестәр әҙерләү буйынса инглиз телендәге берҙән-бер бакалавр программаһы ине һәм сит ил абитуриенттары араһында  популярлыҡ яуланы. ‎

— Сит ил абитуриенттарын йәлеп итеү бер нисә тиҫтә йыл дауамында инде беҙҙең вуз өсөн мөһим бурыс булып тора. Ул бөгөн дә көнүҙәклеген юғалтмай. Уларҙы, тәү сиратта, ӨДНТУ-ның төрлө рейтингтар буйынса юғары позицияларҙа булыуы, шулай уҡ сифатлы белем алыу мөмкинлеге йәлеп итә, — тип билдәләй ӨДНТУ-ның фән һәм инновация эше буйынса проректоры  Денис Гулин. ‎

ӨДНТУ өс тапҡыр программа буйынса  бакалаврҙар сығарҙы: 2024 йылда 13 кеше, 2025 йылда - 28, 2026 йылда 29 кеше. «Petroleum Engineering» төрлө илдәрҙән студенттарҙы ғына түгел, уҡытыусыларҙы ла берләштерә. Улар араһында ӨДНТУ-ның  элек уҡып, университетта эшкә ҡалған сит ил студенттары ла бар. Мәҫәлән, торба үткәреү факультетын тамамлаған Эван Эхов Близ Гаэтан әле ассистент булып эшләй.