Республика етәксеһенең ярҙамсыһы тәғәйенләнде

Республика етәксеһе Радий Хәбировтың Указы менән Тимур Мөхәмәтйәнов Башҡортостан Башлығы ярҙамсыһы итеп тәғәйенләнде. Уның бурыстары иҫәбенә транспорт һәм юл инфраструктураһы, торлаҡ-коммуналь хужалыҡ тармаҡтары үҫешенә, төҙөлөшөнә, төҙөкләндерелеүенә булышлыҡ итеү инәсәк.

Тимур Рәфис улы Мөхәмәтйәнов 1984 йылдың 29 ноябрендә Күмертау ҡалаһында тыуған. Халыҡ-ара бойондороҡһоҙ экология-политология университетын (бакалавр), “Юғары иҡтисад мәктәбе“ дәүләт университетын (магистр), Рәсәй Президенты ҡарамағындағы Халыҡ хужалығы һәм дәүләт хеҙмәте академияһы аспирантураһын тамамлаған.

Хеҙмәт юлын 2008 йылда Рәсәй Федерацияһының Төбәктәр үҫеше министрлығында 1-се разрядлы белгес, һуңынан Халыҡ-ара бәйләнештәр һәм сик буйындағы хеҙмәттәшлекте үҫтереү департаментында дәүләт-ара хеҙмәттәшлек һәм протокол бүлегенең баш белгес-эксперты булып башлаған.

2010–2017 йылдарҙа – Рәсәй Транспорт министрлығының Халыҡ-ара хеҙмәттәшлек департаментында халыҡ-ара ойошмалар, транспорт сәйәсәте һәм төбәктәр хеҙмәттәшлеге бүлегенең 1-се разрядлы белгесе, баш белгес-эксперты, етәксе урынбаҫары, етәксеһе булған.

2017–2020 йылдарҙа Башҡортостандың Транспорт һәм юл хужалығы буйынса дәүләт комитеты рәйесе вазифаһын башҡарған.

Фото: glavarb.ru