Яугир ғаиләләренә утынлата ярҙам

Яугир ғаиләләренә утынлата ярҙам

Башҡортостанда махсус хәрби операцияла ҡатнашыусыларға һәм уларҙың ғаиләләренә 30-ҙан ашыу ярҙам төрө ҡаралған. Шуларҙың береһе - яугир ғаиләләрен утын менән тәьмин итеү. Республика Башлығы ҡарарына ярашлы, махсус операцияла ҡатнашҡан граждандарҙың ғаиләләре йылытыу өсөн льготалы ставка – билдәләнгән хаҡтың 10 процентына торош иткән хаҡ менән утын алырға хоҡуҡлы.

Ауылда өйҙө йылытыу мәсьәләһе – иң мөһимдәрҙең береһе. Был тәңгәлдә Баймаҡ районында шәхси йортто һәм ихаталағы башҡа ҡаралтыларҙы йылытыу өсөн яугирҙәрҙең ғаиләләрен утын менән тәьмин итеү мәсьәләһенә ҙур иғтибар бирелә. 

"Махсус хәрби операция зонаһына гуманитар ылау ойоштороуҙа, шулай уҡ яугир егеттәрҙең ғаиләләренә ярҙам күрһәтеү эштәрендә һәр ваҡыт әүҙемлек күрһәтә таулыҡайҙар. Шуларҙың береһе булып ғаиләләрҙе утын менән тәьмин итеү тора. Ошо көндәрҙә был эштәр йәнә старт алды, Сәлихов Әхсән Хәсән улының командаһы, улдары Азамат һәм Тимербулат, егеттәрҙең ғаиләләрен утын менән тәьмин итеү буйынса эштәр башлап ебәрҙе. Әйткәндәй, беҙҙең ауыл биләмәһендә был эштәр өсөнсө йыл рәттән башҡарылып килә.

"Яугир егеттәргә, уларҙың ғаиләләренә ярҙам итеү беҙҙең бурыс, документтар әҙер булыуға ҡарап артабан да был эштәр дауам итәсәк", - тип билдәләне ауыл биләмәһе башлығы Ҡәйүм Рәжәп улы Уразбаев.

Ҡылған эштәребеҙ изге булып, ил-йортобоҙҙа тыныслыҡ урынлашып, егеттәребеҙҙең яуҙан имен-һау әйләнеп ҡайтыуҙарын теләйек",  - тип хәбәр ителә "Таулыҡай Айыҡ ауыл" төркөмөндә.

Хәтерегеҙгә төшөрәбеҙ, Башҡортостанда контракт буйынса хәрби хеҙмәткә йыйыу дауам итә. Мобиль пункттар республиканың барлыҡ ҡала һәм райондарында эшләй. Бында йыйыу тәртибе, льготалар һәм түләүҙәр тураһында консультация бирәләр, ниндәй документтар кәрәклеген аңлаталар. Дәүләт менән килешеүҙе пенсияға сыҡҡан запастағы хәрбиҙәр, саҡырыу буйынса сроклы хеҙмәттән һуң эшенән киткәндәр, шулай уҡ армияла булмаған, ләкин юғары йәки урта профессиональ белем алған ир-егеттәр ҙә төҙөй ала. Рядовойҙан алып прапорщикка тиклем контракт буйынса хәрби хеҙмәткә 65 йәшкә тиклемге ир-егеттәр ҡабул ителә.

Өфөлә "Төньяҡ амурҙары" исеме аҫтында граждандарҙы контракт буйынса хәрби хеҙмәткә һайлап алыу пункты эшләй башланы. Хәҙер РФ Оборона министрлығы менән контракт төҙөргә теләүселәргә белешмәләр йыйыу һәм медицина тикшереүе үтеү өсөн төрлө адрестар буйынса йөрөргә кәрәкмәй: быларҙың барыһын да бер урында һәм тәүлек эсендә эшләргә мөмкин.

Пунктты Өфө, Элеватор урамы, 15-се йорт адресы буйынса урынлашҡан "Черемушки" һауыҡтырыу шифаханаһы базаһында астылар. Ул  ҡалаға көньяҡтан ингән ерҙә, Тирмән комбинаты районында урынлашҡан. Үҙәккә Башҡортостандан да, башҡа төбәктәрҙән дә контракт буйынса хәрби хеҙмәткә инергә теләгән 18 - 65 йәшлек ир-егеттәр мөрәжәғәт итә ала. Уларҙың теркәлеү урыны иҫәпкә алынмай.Үҙегеҙ менән паспорт, хәрби билет, ғаиләгеҙ, белемегеҙ тураһында документтар, СНИЛС һәм ИНН алырға кәрәк.

Үҙәктә хәрби комиссариат хеҙмәткәрҙәре, табиптар һәм банк вәкилдәре эшләй. Кандидаттарҙың мөмкин тиклем тиҙерәк медицина комиссияһын үтеү, анализдар тапшырыу, документтарын тәртипкә килтереү, кәрәк булғанда "Мир" банк картаһын алыу мөмкинлеге бар. Тап ошо картаға бер тапҡыр бирелә торған түләү һәм эш хаҡы киләсәк. Шулай уҡ бында төндө үткәреү өсөн номерҙар фонды, өс тапҡыр ашатыу хеҙмәте ҡаралған. Былар барыһы ла бушлай. Үҙәктән граждандар хәрби командалар составында шунда уҡ хеҙмәт урынына китә.

Алдан хәбәр итеүебеҙсә, Оборона министрлығы менән килешеү төҙөгәндәргә Өфө ҡалаһы бер тапҡыр бирелә торған аҡсалата түләү күләмен 300 меңдән 400 мең һумға тиклем арттырҙы. Стәрлетамаҡтар ҙа контрактсыларға ошо сумманы түләйәсәк. Шулай итеп, эш хаҡын иҫәпкә алғанда, йыллыҡ түләүҙәрҙең дөйөм суммаһы 4 520 000 һум тәшкил итәсәк.

Башҡортостанда контракт хеҙмәте тураһында тулыраҡ мәғлүмәтте башбат.рф сайтында йәки Ситуация үҙәгендә +7 (347) 218-19-19 телефоны буйынса алырға мөмкин. Шулай уҡ 122 йәки 8 800 550 5525 телефондарына шылтырата алаһығыҙ.

Фото: "Таулыҡай Айыҡ ауыл" төркөмө.