Яугирҙәрҙең яҡындары депутат менән осрашты

“Ете ҡыҙ” проектын ойоштороусылары ауыр тормош хәлендә ҡалған ҡатын-ҡыҙҙарҙы берләштереү һәм уларға кәрәкле ярҙам күрһәтеү маҡсатын ҡуя. Яңыраҡ махсус хәрби операцияла ҡатнашҡан яугирҙәрҙең әсәйҙәре, ҡатындары, туғандары өсөн Дәүләт Думаһы депутаты Зариф Байғусҡаров менән осрашыу үткәрҙеләр.

Депутат сарала ҡатнашыусыларға 1 марттан көсөнә ингән 498-се Федераль закондың махсус хәрби операцияла ҡатнашҡан осорҙа яугирҙәрҙең эш урынын һаҡлап ҡалыуын гарантиялауын аңлатты.

Зариф Закир улы шулай уҡ ҡатын-ҡыҙҙарға 118-се федераль закон барлығы һәм ул махсус хәрби операцияла ҡатнашыусыларҙың ғаиләләренә ярҙам итеүгә йүнәлтелгәнлеге тураһында һөйләне. Был закон 1 ғинуарҙан ғәмәлдә. 118-се федераль законға ярашлы, махсус хәрби операцияла ҡатнашыусы һәләк булғанда уларҙың ҡатындары, яугирҙең балаларын ҡараусылар, пенсияға хоҡуғы булған балаға 23 йәш тулғансы, ҡараусыһын юғалтыу буйынса пенсия ала ала. Элек закон бындай ғаиләләргә, әгәр уларҙа балалар тәрбиәләнһә, һигеҙ йәшкә тиклем генә ике пенсия алыу хоҡуғын күҙ уңында тота ине.

Бынан тыш, был закон өлөшләтә төҙөлөштә ҡатнашыусыларҙың ғаиләләренә ярҙам итеүгә йүнәлтелгән, тол ҡатындарға, түләү хоҡуғын юғалтмай, ҡабаттан никахҡа инергә мөмкинлек бирә. 

Осрашыу барышында ҡатнашыусылар үҙҙәренең ғаилә тарихтары һәм мәсьәләләре тураһында һөйләне. Бер ҡатын депутаттан махсус хәрби операцияла хәбәрһеҙ юғалған яугир тураһында мәғлүмәт табырға ярҙам итеүен һораны. Сарала ҡатнашҡан башҡа гүзәл заттар ҙа тейешле түләүҙәрҙе алыуҙа осраған ауырлыҡтар тураһында һөйләне, ә ҡайһы берҙәрендә документтарҙа ебәрелгән хаталар арҡаһында ҡаршылыҡтарға осраған, был уларға финанс ярҙам алыуҙы ҡыйынлаштырған.

Мәҫәлән, Әбйәлил районынан Азалия ауылдаштарының – генерал Шайморатов исемендәге батальон яугирҙәренең хәтерен мәңгеләштереүҙә ярҙам һорап мөрәжәғәт итте. Улар араһында уның бер туған ағаһы ла бар. Был ир МХО юлланғанға тиклем ҡатынын юғалтып, ун йыл дауамында өс балаһын яңғыҙ тәрбиәләгән булған. МХО-ла һәләк булғандан һуң балалар үкһеҙ етем ҡалған, әммә улар тейешле түләүҙәр алмай икән.

Осрашыу барышында Йылайыр районынан Светлана, онлайн-элемтәгә сығып, депутатҡа бер нисә тапҡыр ярҙам күрһәткәне өсөн рәхмәт белдерҙе. Уның ире 2022 йылда өлөшләтә мобилизация сиктәрендә РФ Ҡораллы Көстәре сафына саҡырыла. Бюрократик кәртәләр арҡаһында яугир бер йыл самаһы хәрби хәрәкәттәр танытмаһын ала алмай интегә, шулай уҡ оҙаҡ ваҡыт ялға ла ҡайта алмай. Депутат был мәсьәләне контролгә алғандан һуң барлыҡ һорауҙар ҙа тиҙ арала хәл ителгән. Өс айҙан Светлана йәнә Зариф Байғусҡаровҡа мөрәжәғәт итергә мәжбүр була. Уның алғы һыҙыҡта булған иренең һаулығына бәйле етди мәсьәләләр тыуа. Һөҙөмтәлә яугирҙе Екатеринбургка алып киләләр, дауаханаға һалалар, операция яһайҙар һәм хәҙер ул өйҙә реабилитация үтә.

Депутат Зариф Байғусҡаров һәр ҡатын-ҡыҙҙы иғтибар менән тыңланы, бөтә мөрәжәғәттәрҙе ҡарарға вәғәҙә бирҙе, шулай уҡ яҡындарын юғалтҡандарға ҡайғы уртаҡлашыуын белдерҙе. Депутат илебеҙҙә яугирҙәр һәм уларҙың ғаиләләренә ярҙам күрһәтеү, яҡлау буйынса бик күп закондар ҡабул итеүе хаҡында һөйләне,  ҡануниәт менән ныҡлап танышып барырға кәрәклеген дә әйтеп үтте.

Осрашыу бик йөкмәткеле һәм фәһемле булды. Унда ҡатнашҡан ҡатын-ҡыҙҙар асылып, депутатҡа барлыҡ борсоған мәсьәләләрен һөйләне һәм ошондай сараның йышыраҡ үтеүен һораны.

Иҫегеҙгә төшөрәбеҙ, Рәсәй Президенты Владимир Путин махсус хәрби операция яугирҙәренә һәм уларҙың ғаилә ағзаларына ярҙам итеү маҡсатында “Ватанды һаҡлаусылар” дәүләт фондын булдырҙы.

”Ватанды һаҡлаусылар" фондының Башҡортостан Республикаһындағы филиалы адресы: Өфө ҡалаһы, Минһажев урамы, 107-се йорт. Телефоны: 8 (347) 268-01-02.

Рәмилә МУСИНА фотолары.