Ҡаһарманлыҡ өлгөһө дыуандар!

Ошо арала Дыуан районы башлығының махсус хәрби операция биләмәһенә гуманитар ылау алып барыуы хаҡында хәбәр иткәйнек инде. Фаил Рафаэль улы  Мөхәмәҙиев, юлдаштары менән, яугирҙәргә туғандарынан посылкалар, аҙыҡ-түлек, кәрәк-яраҡ әйберҙәр һәм хаттар тапшырған.

- 5000 саҡрымдан ашыу юл, йөҙәрләгән яугиребеҙ менән осрашыу, күҙгә-күҙ ҡарашып һөйләшеү... Әммә, иң мөһиме, рух көсөн, берҙәмлекте һәм Еңеүгә ышанысты тойоу. Мин егеттәрҙең күҙҙәрендә көс, ышаныс һәм сыҙамлыҡ күрҙем, - тип уртаҡлашты Фаил Рафаэль улы.

Уның һүҙҙәренсә, уҡыусыларҙың яҙған хаттарына егеттәр айырыуса ҡыуанған: “Уҡыйһың, һәм бер мәлгә өйгә ҡайтҡандай булаһың, шул уҡ ваҡытта һине көткәндәрен тояһың. Саф йөрәктән яҙылған был ябай юлдар көс бирә, кәйефте күтәрә, беҙҙең ни өсөн алғы һыҙыҡта тороуыбыҙҙың мөһимлеген билдәләй”, - ти улар.

Рәсәй Федерацияһының йөкләмәһе буйынса махсус хәрби операция биләмәһенә һуңғы эш сәфәре барышында район хакимиәте башлығы Дыуан районының 10 ҡаһарман һалдатына Генерал Миңлеғәле Шайморатов миҙалын тапшырған.

- Был наградалар - уларҙың батырлыҡтары, сыҙамлыҡтары һәм үҙ-үҙҙәрен аямай лайыҡлы хеҙмәт итеүҙәре билдәһе. Был егеттәрҙең һәр береһе ысын ҡаһарманлыҡ, Ватанға тоғролоҡ күрһәтте һәм тыуған ерен, беҙҙең киләсәкте һаҡлап, хеҙмәтен намыҫ менән башҡара, - тип ғорурланып һөйләне яҡташтары тураһында Фаил Рафаэль улы. - Райондаштарҙың барыһына ла мөрәжәғәт итәм - беҙ һеҙҙең менән бер ғаилә булып, яугирҙәребеҙгә, яҡындарыбыҙға ярҙам итергә тейешбеҙ. Алла бирһә, егеттәребеҙ иҫән-һау, еңеү менән тиҙерәк ҡайтһын! Мин ышанам, был көн мотлаҡ буласаҡ!

Фотолар: Дыуан районы хакимиәтенең матбуғат хеҙмәте.